İRAN VƏ SƏUDİYYƏ ƏRƏBİSTANI RƏHBƏRLƏRİ İSLAM DÜNYASININ AKTUAL PROBLEMLƏRİNİ MÜZAKİRƏ ETMİŞLƏR
AZƏRTAC İRNA agentliyinə istinadla xəbər verir ki, fevralın 2-də telefon söhbəti zamanı Əhmədinejad bir sıra Avropa ölkələrinin KİV-lərində Məhəmməd Peyğəmbərə təhqiramiz karikaturalar dərc edildiyini xatırladaraq demişdir: “Belə əməllər mənəviyyatın və insan əxlaqının əsas prinsiplərinə ziddir və lənətlənməlidir. İslam Peyğəmbərinin ünvanına təhqirlər müsəlmanları və İslam ölkələrini hiddətləndirir. Əgər adekvat tədbirlər görülməsə, gələcəkdə düşməncəsinə çıxışlar daha təhqiramiz olacaqdır”.
Söhbət zamanı İslamın müqəddəs ocaqları və müsəlmanların dini hissləri barəsində təhqiramiz əməllərə qarşı siyasi-iqtisadi tədbirlər də müzakirə olunmuşdur.
Tərəflər öz ölkələrinin İslam dünyasında mühüm rol oynadığını, regional və beynəlxalq siyasətə təsirinin artdığını qeyd etmişlər. Onlar İslam dünyasının sıx birləşməsi üçün İranın və Səudiyyə Ərəbistanının daha səmərəli tədbirlər həyata keçirməsinin vacibliyini vurğulamışlar.
