İRANDA QURANIN NADİR NÜSXƏSİ HAZIRLANIR
Tehranın 170 kilometr cənubunda yerləşən Qum şəhəri təkcə dini mərkəz kimi deyil, həm də toxucu ustaların və miniatürçü rəssamların cəmləşdiyi bir şəhər kimi məşhurdur. Bu şəhər indi də ağac üzərində oyma ustaları ilə məşhurlaşmışdır. Onlardan biri, Seyid Fərşad Mələkniyə müsəlmanlarin müqəddəs kitabı Quranın ağac üzərində yeni nüsxəsini yaratmaq qərarına gəlmişdir.
O, artıq işə başlamış və ötən dörd ay ərzində ağac lövhələr üzərində Quranın ilk beş səhifəsini oyaraq, onu müxtəlif təbii boyalarla rənglənmiş naxışlarla bəzəmişdir. Quranın taxta üzərindəki “səhifələrinin” ölçüsü 1,2 x 2,4 metr, qalınlığı isə 4,5 santimetrdir. Bütünlükdə isə səhifələrin sayı 110 olacaqdır.
Gələcək kitabın müəllifinin dediyinə görə, onun hazırlanmasına altı il vaxt tələb olunur. Lakin bu işə başqa ustalar da cəlb olunarsa, onu üç ilə hazırlamaq mümkündür.
İTAR-TASS-ın verdiyi xəbərə görə, bu nadir kitabın hər bir səhifəsinin qiyməti 5,6 min dollardır. Beləliklə, onun ilkin qiyməti 618750 dollar təşkil edəcəkdir.
Qum şəhərində Quranın ağac nüsxəsinin hazırlanması xəbəri çox sürətlə yayılmışdır. Artıq iki islam ölkəsindən onun əldə edilməsi barədə sifariş alınmışdır. Lakin bu incəsənət əsərinin satışı barədə hələlik heç bir qərar qəbul edilməmişdir.
Bölmənin digər xəbərləri
