İSLAM KONFRANSI TƏŞKİLATI DAĞLIQ QARABAĞDA “SEÇKİLƏR” KEÇİRİLMƏSİNİ QANUNSUZ SAYIR
İslam Konfransı Təşkilatının Baş katibliyi erməni separatçılarının Dağlıq Qarabağda “prezident seçkiləri” keçirmək niyyətləri ilə əlaqədar mətbuat üçün bəyanat yaymışdır.
Ölkəmizin Səudiyyə Ərəbistanındakı səfirliyindən AZƏRTAC-a daxil olmuş bəyanatda deyilir ki, İslam Konfransı Təşkilatı Azərbaycan Respublikasının bir hissəsi olan Dağlıq Qarabağda avqustun 11-də “prezident seçkilərinin” keçirilməsi ilə bağlı Ermənistan hökumətinin tədbirlərini dərin həyəcanla izləyir. İKT bu tədbirlərin qanunsuz olduğunu və problemin daha da mürəkkəbləşməsinə, bölgədə sülhün gələcəyi üçün təhlükə yaradacağına səbəb olacağını bildirir.
Bəyanatda daha sonra vurğulanır ki, İKT Azərbaycan Respublikası hökumətinin soyuqqanlı siyasətini dəstəkləyərək, bu mühüm bölgədə təhlükəsizliyin və sabitliyin təmin olunması üçün Ermənistan Respublikasını Azərbaycan torpaqlarını tamamilə azad etmək, bu ölkənin suverenliyinə və ərazi bütövlüyünə hörmət bəsləmək barədə BMT Təhlükəsizlik Şurasının, İslam Konfransı Təşkilatının və ATƏT-in qərarlarını yerinə yetirməyə çağırır.
Bölmənin digər xəbərləri
