İSPANİYADA NARKOTİK MADDƏLƏRDƏN İSTİFADƏ HALLARISON 10 İLDƏ İKİ DƏFƏ ARTMIŞDIR

15.12.2006 [12:01]
Çap et
A⁺ A^-

AZƏRTAC-ın xüsusi müxbiri Frans Press agentliyinə istinadən xəbər verir ki, 15-64 yaşlı ispanlar arasında narkotik maddələrdən istifadə halları son 10 ildə iki dəfə artmışdır.

2005-2006-cı illərdə 27869 ispan arasında aparılmış sorğu zamanı onların 7 faizi həyatlarında azı bir dəfə kokaindən istifadə etdiyini bildirmişdir. 1995-ci ildə qeydə alınmış 3,4 faizlə müqayisədə bu rəqəm iki dəfə artmışdır.

Ölkənin səhiyyə naziri ispanlar arasında narkotik maddələrə meylin artdığı bir vaxtda siqaretə aludəçiliyin azaldığını, 1995-ci ildə əhalinin 35,2 faizi, 2003-cü ildə 36,9 faizi, 2005-2006-cı illərdə isə 33,1 faizinin siqaret çəkdiyini bildirmişdir.

Səhiyyə nazirinin sözlərinə görə, son illər Avropada narkotik maddələr arasında kokaindən istifadə halları daha çox artmışdır.

Avropanın giriş qapısı sayılan İspaniyaya narkotik maddələr əsasən Amerikadan, Mərakeşdən gətirilir və oradan digər ölkələrə aparılır.