İSRAİL KOMANDASI ÜZƏRİNDƏ QAZANILAN QƏLƏBƏ SAYƏSİNDƏ AZƏRBAYCAN YIĞMASI QRUP LİDERİ OLDU
Bakı, 10 oktyabr (AZƏRTAC). Azərbaycanın U-19 yığması Avropa çempionatının ilkin seçmə mərhələsi çərçivəsində İsrail komandasını 3:0 hesabı ilə məğlub etmişdir.
AFFA-nın saytının verdiyi xəbərə görə, oyunda hesabı 20-ci dəqiqədə Orxan Həsənov açmışdır. 10 dəqiqə sonra Tural İsgəndərov komandamızın üstünlüyünü 2 topa çatdırmışdır. Hakimin final fitinə 6 dəqiqə qalmış isə Orxan Həsənov növbəti dəfə fərqlənərək oyunun yekun hesabını müəyyənləşdirmişdir.
Qrupun digər oyununda Polşa yığması Danimarka komandasına 2:1 hesabı ilə qalib gəlmişdir.
İlk turdakı nəticələrə əsasən, Azərbaycan yığması turnir cədvəlinə başçılıq edir. Polşa yığması ikinci, Danimarka üçüncü, İsrail U-19-u isə dördüncü pillədə qərarlaşmışdır.
Komandamız növbəti oyununu oktyabrın 11-də Polşa yığmasına qarşı keçirəcəkdir.
Qeyd edək ki, bu qrupun bütün oyunları İsraildə keçirilir.
Bölmənin digər xəbərləri
