İsrail səfiri: Kibertəhlükəsizlik artıq yalnız texniki sahə deyil, strateji prioritetdir VİDEO
Bakı, 9 fevral, AZƏRTAC
Azərbaycan Kibertəhlükəsizlik Mərkəzi təkcə təlim müəssisəsi deyil, eyni zamanda vizyonun, insan kapitalına yatırımın və bilik gücünə inamın simvoludur.
AZƏRTAC xəbər verir ki, bu sözləri İsrailin Azərbaycandakı səfiri Ronen Kraus fevralın 9-da Bakıda Azərbaycan Kibertəhlükəsizlik Mərkəzinin 6-cı məzun günü mərasimində çıxışı zamanı deyib.
“Azərbaycan və İsrail arasında bu birgə təşəbbüs kibertəhlükəsizliyin artıq yalnız texniki sahə olmadığını göstərir. Bu, milli təhlükəsizlik, iqtisadi dayanıqlılıq və texnoloji inkişaf üçün strateji dayağa çevrilib”, - deyə səfir əlavə edib.
Ronen Kraus qeyd edib ki, müasir dövrdə kibertəhlükəsizlik infrastrukturu ilə yanaşı, ən vacib məsələ yüksəksəviyyəli insan kapitalının formalaşdırılmasıdır. Onun sözlərinə görə, yüzlərlə mütəxəssisin hazırlanması və onların dövlət və özəl sektorda əsas mövqelərdə fəaliyyət göstərməsi mühüm nailiyyətdir.
Səfir 6-cı dalğanın məzunlarını təbrik edərək vurğulayıb ki, onlar intizam, davamlılıq və intellektual cəsarət tələb edən çətin bir yolu uğurla başa vurublar: “Siz sürətlə dəyişən və ictimaiyyət üçün çox vaxt görünməyən, lakin həyati əhəmiyyət daşıyan bir sahəni seçmisiniz”
Diplomat, həmçinin məzunlara müraciət edərək bildirib ki, kibertəhlükəsizlik daim inkişaf edən sahədir və gələcəkdə qarşılaşacaqları çağırışlar bu gün öyrəndiklərindən fərqli ola bilər. “Heç vaxt öyrənməyi dayandırmayın,” – deyə Ronen Kraus əlavə edib.
Bölmənin digər xəbərləri
