Qış Olimpiadası: İsrail idmançıları qarət olunublar
Bakı, 9 fevral, AZƏRTAC
İtaliyada keçirilən Qış Olimpiya Oyunlarında xoşagəlməz hadisə baş verib.
AZƏRTAC xəbər verir ki, bobsley üzrə İsrail milli komandası qarət olunub.
Bu barədə yığma üzvü Adam Edelman sosial şəbəkə hesabında paylaşım edib. Onun sözlərinə görə, naməlum şəxslər komandanın otağına daxil olaraq, idmançılara məxsus pasportları və 3000 ABŞ dolları dəyərində əşyaları oğurlayıblar.
Oğurluq hadisəsindən sonra ianə kampaniyasına start verilib. İdmançılara təkcə oğurlanmış əşyaları geri qaytarmaq üçün deyil, həm də Olimpiadaya hazırlıq məqsədilə götürülmüş kreditləri, avadanlıq icarəsini və məşqçilərin maaşlarını ödəmək üçün lazım olan 100 000 dollardan 77 000 dolları toplanıb.
Qeyd edək ki, “Milan-Kortina-2026” Qış Olimpiya Oyunlarına fevralın 22-də yekun vurulacaq.
Bölmənin digər xəbərləri
