İnnovativ kommunikasiya kontekstində dilçilik və tədris metodikası - beynəlxalq konfrans
Bakı, 9 fevral, AZƏRTAC
Azərbaycan Memarlıq və İnşaat Universitetinin (AzMİU) 50 illik yubileyi çərçivəsində “İnnovativ kommunikasiya kontekstində dilçilik, ədəbiyyat və tədris metodikası” mövzusunda onlayn formatda beynəlxalq elmi-praktik konfrans keçirilib.
Bu barədə AZƏRTAC-a AzMİU-dan məlumat verilib. Konfransın açılış mərasimində AzMİU-nun rektoru memarlıq doktoru, professor, Əməkdar memar Gülçöhrə Məmmədova çıxış edərək Prezident İlham Əliyevin yerli televiziya kanallarına verdiyi müsahibədə Azərbaycan dili ilə bağlı mühüm təşəbbüslərini vurğulayıb. O qeyd edib ki, dövlət başçısının ana dilimizin qorunması, zənginləşdirilməsi və elmi müstəvidə inkişafı istiqamətində müəyyən etdiyi strateji xətt ali təhsil müəssisələri qarşısında mühüm vəzifələr müəyyənləşdirir.
Rektor qeyd edib ki, bu beynəlxalq elmi-praktik konfrans dilçilik, ədəbiyyat və dil tədrisi sahəsində milli dəyərlərin qorunması ilə yanaşı, innovativ yanaşmaların təşviqinə xidmət edir. Qloballaşan dünyada innovativ kommunikasiya bacarıqları mühəndislik, memarlıq və texniki ixtisaslar üzrə təhsil alan gənclər üçün strateji əhəmiyyət daşıyır. AzMİU-da dil tədrisinə xüsusi önəm verilir və universitetdə tədris Azərbaycan, ingilis və rus dillərində aparılır. Bununla yanaşı, ingilis, rus, alman, fransız və italyan dilləri tədris olunur. Bu yanaşma tələbələrin beynəlxalq akademik mühitə inteqrasiyasını asanlaşdırır, onların qlobal əmək bazarında rəqabət qabiliyyətini artırır.
Konfransda AzMİU-nun Əcnəbi dillər kafedrasının müdiri filologiya üzrə fəlsəfə doktoru, dosent Aygün Məmmədova kafedranın kadr potensialı, elmi-pedaqoji fəaliyyəti və tətbiq etdiyi innovativ tədris metodikası barədə ətraflı məlumat verib. O, dil tədrisində kommunikativ yanaşma, rəqəmsal resurslardan istifadə və tələbəyönümlü metodların üstünlüklərini önə çəkib.
Aygün Məmmədova konfransın əsas məqsədinin alimlərin elmi fəaliyyətinin tanıdılması, fikir və təcrübə mübadiləsinin aparılması, multidisiplinar yanaşmaların genişləndirilməsi, müasir dilçilik və dil tədrisinin strateji inkişaf istiqamətlərinin müəyyənləşdirilməsi olduğunu bildirib. Qeyd olunub ki, konfrans toplusuna ümumilikdə 78 məqalə təqdim edilib. Onlardan 27-si dilçilik və ədəbiyyat, 51-i isə tədris metodikası sahəsini əhatə edir. Məruzələrdə Azərbaycan dilinin saflığının qorunması, müasir informasiya mühitində dil normalarının pozulması, ekran və efir nitqində dil mədəniyyəti kimi məsələlər xüsusi diqqət mərkəzində olacaq. Bu baxımdan təqdim olunan məruzələr Azərbaycan dili ilə bağlı dövlət səviyyəsində aparılan siyasətə elmi yanaşmaların təqdim edilməsi baxımından aktual xarakter daşıyır.
Daha sonra AzMİU-nun elm və innovasiyalar üzrə prorektoru professor Nigar Aslanova, Azərbaycan Dillər Universitetinin elm və innovasiyalar üzrə prorektoru professor Həmidə Əliyeva, AMEA Nəsimi adına Dilçilik İnstitutunun Süni intellekt və kompüter dilçiliyi şöbəsinin baş elmi işçisi dosent Nərmin Əliyeva, Azərbaycan Dillər Universitetinin İngilis dilinin tədrisi metodikası kafedrasının müdiri pedaqoji elmlər doktoru, dosent Günay Şirəliyeva, Bakı Dövlət Universitetinin İngilis dili (humanitar fakültələr üzrə) kafedrasının baş müəllimi filologiya üzrə fəlsəfə doktoru Mənsurə Ağayeva və Milli Aviasiya Akademiyasının İngilis dili kafedrasının baş müəllimi filologiya üzrə fəlsəfə doktoru Günay Mirzəyeva çıxış edərək müasir dilçilik, süni intellektin dil tədrisinə təsiri və əcnəbi dillərin tədrisində aktual metodoloji yanaşmalarla bağlı fikirlərini bölüşüblər.
Plenar iclasdan sonra konfrans işini “Müasir dilçilik və ədəbiyyatşünaslığın aktual problemləri” və “Əcnəbi dillərin müasir tədris metodikasının aktual problemləri” bölmələri üzrə davam etdirib.
Konfransda Azərbaycanla yanaşı, Türkiyə, İngiltərə, Fransa, Niderland, Qazaxıstan, Özbəkistan və Qırğızıstanın müxtəlif ali təhsil müəssisələrindən olan alimlər və dilçi mütəxəssislər müzakirələr aparıblar.
Bölmənin digər xəbərləri
