İSRAİLİN MÜDAFİƏ NAZİRİ “HƏMAS” YARAQLILARINI MƏSULİYYƏTLİ SİYASƏTÇİLƏR KİMİ TANIYIR
Mofazın fikrincə, yaxın vaxtlarda “Həmas” Fələstin terrorunu dayandırmağa, o cümlədən “İslami cihad” qruplaşmasını öz nəzarəti altına almağa çalışacaqdır. İsrail hərbi idarəsinin başçısı vurğulamışdır ki, seçkilərdən sonra ilk günlərdə “Həmas” Fələstinin yeni hökumətinə öz siyasi liderlərinin deyil, peşəkarların namizədliyini irəli sürməyə çalışdığını nümayiş etdirmişdir.
Bununla yanaşı, o, nəzərə çarpdırmışdır ki, İsrail hökumətinin “Həmas”a münasibəti güzəştsiz olaraq qalmalıdır. Mofaz bu qruplaşmadan silahı yerə qoymağı və İsraili məhv etməyi nəzərdə tutan öz nizamnaməsini dəyişdirməyi bir daha tələb etmişdir.
Bundan əvvəl İsrailin Baş naziri əvəzi Ehud Olmert “Həmas”ın formalaşdırdığı yeni hökumətlə danışıqlara başlamağın üç əsas şərtini açıqlamışdır. Onun sözlərinə görə, qruplaşma zorakılıqdan əl çəkməli, silahı tamamilə yerə qoymalı, İsrailin mövcud olması hüququnu, eləcə də İsrail ilə Fələstin Muxtariyyəti arasında imzalanmış bütün sazişləri tanımalıdır.
