İstanbulda “Qarabağ və Şərqi Zəngəzura Böyük qayıdış” mövzusunda tədbir keçirilib
Bakı, 29 dekabr, AZƏRTAC
Türkiyədə fəaliyyət göstərən “Xarıbülbül” Azərbaycan Vizyon Teatr Dərnəyi tərəfindən təşkil edilən “Biz birlikdə güclüyük” adlı silsilə tədbirlər çərçivəsində İstanbulda “Qarabağ və Şərqi Zəngəzura Böyük qayıdış” mövzusunda tədbir keçirilib.
Diasporla İş üzrə Dövlət Komitəsindən AZƏRTAC-a bildirilib ki, tədbirdə əvvəlcə Türkiyədə fəaliyyət göstərən diaspor təşkilatları ilə bağlı gələcək layihələrin daha yüksək səviyyədə gerçəkləşdirilməsi, saylarının artırılması barədə görülən işlərdən bəhs olunub.
Sonra 1990-cı illərdə yurd-yuvalarından məcburi didərgin salınan, hazırda doğma torpaqlarına qayıdan həmvətənlərimizə Azərbaycan dövləti tərəfindən göstərilən qayğı, eləcə də işğaldan azad edilmiş ərazilərimizdə aparılan bərpa-quruculuq işləri ilə bağlı videoçarxlar göstərilib.
Tədbirdə Azərbaycan Rəssamlar İttifaqının üzvlərinin, Azərbaycanın xalq yaradıcılığı üzrə mütəxəssis Elnarə Rəsulovanın ideya müəllifi olduğu əsərlər, eləcə də sənətkara məxsus “Ata vəsiyyəti, oğul Zəfəri”, “Dəmir yumruq”, “Laçın zirvəsi”, “Bir millət, iki dövlət… tək yumruq”, “Soyumuz bir, dinimiz bir...” mövzularına həs olunmuş xalçalar, dünyanın məşhur muzeylərində saxlanılan və Azərbaycanın 7 bölgəsinə aid qədim xalçaların replikaları, həmçinin Teatr Birliyi sədrinin müavini Lətafət Rəfiqin, Türkiyə-Azərbaycan Vizyon Teatrının rəssamı Tariyel Əlizadənin, əl işləri sənətçisi Fatimə Abdalın əsərləri sərgilənib.
Bədii hissədə Azərbaycan Mədəniyyət Mərkəzinin solisti, “Xarıbülbül” Azərbaycan Mədəniyyət Mərkəzinin musiqi departamentinin rəhbəri Vüsalə Əsgərova, mərkəzin Qadın Birlikləri Departamentinin rəhbəri Nazlı Bağırova, solist Yelena Qolovina, aşıq Rəna Quliyeva, eləcə də "Günəş" xor və rəqs kollektivi musiqi nömrələri ilə çıxış ediblər.
Qeyd edək ki, tədbir Diasporla İş üzrə Dövlət Komitəsinin, Qaçqınların və Məcburi Köçkünlərin İşləri üzrə Dövlət Komitəsinin, Azərbaycan Diasporuna Dəstək Fondunun (ADDF), Türkiyə-Azərbaycan Dərnəkləri Federasiyasının (TADEF), eləcə də İstanbul Türkiyə-Azərbaycan Həmrəylik və Mədəniyyət Dərnəyinin dəstəyi ilə təşkil olunub.
Bölmənin digər xəbərləri
