İstehlak bazarının keyfiyyətsiz mal və xidmətlərdən qorunmasında maarifləndirmə işi mühüm rol oynayır

16.04.2016 [13:36]
Çap et
A⁺ A^-

Qəbələ, 16 aprel, Şahnəzər Bəşirov, AZƏRTAC

İqtisadiyyat Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə Qəbələ Rayon İcra Hakimiyyətində dövlət qurumlarının regional bölmələrinin, ictimai təşkilatların nümayəndələrinin və istehlakçıların iştirakı ilə "Hər bir istehlakçı öz hüquqlarını bilməli və tələb etməlidir" mövzusunda konfrans keçirilib.

AZƏRTAC xəbər verir ki, tədbirdə rayon icra hakimiyyəti başçısının müavini Arif Allahverdiyev çıxış edərək, ölkəmizin bütün şəhərlərinin, qəsəbə və kəndlərinin abadlaşdığını, yeni-yeni istehsal müəssisələrinin açıldığını, əhalinin məşğulluğunun təmin edildiyini diqqətə çatdırıb. Qeyd olunub ki, Prezident İlham Əliyevin ərzaq təhlükəsizliyi və istehlakçıların hüquqlarının qorunmasının təmin edilməsinə dair imzaladığı müvafiq fərmanlar bu inkişafın davamlı olmasına, onun keyfiyyətcə daha yüksək səviyyəyə qaldırılmasına təkan verib. Ölkədə keyfiyyətsiz malların satılmasına ciddi qadağa qoyulması və nəzarət tədbirlərinin gücləndirilməsi bizləri daha məsuliyyətli olmağa sövq edib.

Konfransda çıxış edən İqtisadiyyat Nazirliyinin Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəis müavini Araz Əliyev istehlak bazarının keyfiyyətsiz mal və xidmətlərdən qorunmasında maarifləndirmə və təbliğat-təşviqat işlərinin əhəmiyyətindən danışıb, tədbir iştirakçılarına istehlakçıların hüquqlarının qorunması sahəsində qanunvericilik, istehlakçıların hüquqları barədə ətraflı məlumat verib.

Araz Əliyev Dövlət Xidməti tərəfindən bu istiqamətdə həyata keçirilən tədbirləri diqqətə çatdırıb. Bildirilib ki, ötən il Dövlət Xidməti tərəfindən aidiyyəti dövlət qurumlarının, ictimai təşkilatların, sahibkarlıq subyektlərinin və ictimaiyyət nümayəndələrinin iştirakı ilə paytaxt Bakıda və regionlarda konfranslar, “dəyirmi masa” və seminarlar keçirilib, istehlakçıların maarifləndirilməsi və sahibkarların məlumatlandırılması məqsədilə maarifləndirici broşürlər paylanılıb.

Konfransda Dövlət Xidmətinin əməkdaşları istehlakçı hüquqlarının müxtəlif aspektləri ilə bağlı məruzələrlə çıxış edib, xidmət qaydalarının tələblərinə əməl olunması və xidmət mədəniyyətinin yüksəldilməsi istiqamətində həyata keçirilən tədbirlər, istehlakçıların mal və xidmət alarkən diqqət yetirməli olduğu məsələlər, xidmət müəssisələrinin vəzifələri barədə ətraflı məlumat verib, tədbir iştirakçılarının suallarını cavablandırıblar.

Sonda tədbir iştirakçılarına istehlakçı hüquqlarına dair maarifləndirici materiallar paylanılıb.