İsveç və Finlandiya silahlı qüvvələri birgə hərbi təlimlər keçirəcəklər
Stokholm, 20 fevral, AZƏRTAC
İsveç və Finlandiya silahlı qüvvələri “Northern Wind 2019” (“Şimal küləyi 2019”) adlı birgə hərbi təlimlər keçirəcəklər.
AZƏRTAC İsveç KİV-lərinə istinadla xəbər verir ki, hərbi təlimlər martın 18-27-dək İsveçin uzaq şimalında Norrbotten dairəsində keçiriləcək. Təlimlərdə İsveç və Finlandiya hərbi qulluqçuları ilə yanaşı Norveç, Böyük Britaniya və ABŞ silahlı qüvvələrindən olan qruplar da iştirak edəcəklər.
Təlimlərə cəlb ediləcək 10.000 nəfərin təqribən 7.000 nəfəri Finlandiya, Norveç, ABŞ və Böyük Britaniya hərbi qulluqçuları olacaq. Finlandiya tərəfindən bu təlimlərdə 500 nəqliyyat vasitəsi və 1500 əsgər iştirak edəcək.
İsveç silahlı qüvvələrinin saytında dərc edilmiş məlumata görə, “Northern Wind 2019” təlimlərinin məqsədi İsveçin milli müdafiə imkanlarını inkişaf etdirməkdir. Bu təlimlər sayəsində İsveç başqa ölkələrdən olan bölmələrlə birlikdə briqada səviyyəsində döyüş əməliyyatları aparmaq vərdişlərini təkmilləşdirir. Bundan əlavə, təlimlər İsveçin şimalında qış dövründə keçirildiyi üçün onun iştirakçısı olan bölmələr qış mövsümündə müharibənin gedişində öz imkanlarını sınaqdan keçirəcəklər.
Rauf Əliyev
AZƏRTAC -ın xüsusi müxbiri
Stokholm
Bölmənin digər xəbərləri
