KEÇİRİLƏN SƏRGİ SAĞLAM İŞBİRLİYİNİN YARANMASI ÜÇÜN FAYDALIDIR
“BAKUBUİLD-2004” 10-cu Azərbaycan beynəlxalq inşaat sərgisində təmsil olunan Türkiyənin “Göker” tikinti maşınları şirkətinin vitse-prezidenti Tamer Türkmən AZƏRTAC-ın müxbirinə bildirmişdir ki, son illərdə Azərbaycanda gedən geniş quruculuq və inşaat işləri və bu sərginin təşkili gələcək əlaqələrin inkişafında, sağlam işbirliyinin yaranmasında böyük rol oynayacaqdır. Stasionar və mobil beton zavod, nasos və avtomatik beton qarışdıran maşınların istehsalı və satışı ilə məşğul olan şirkətin əməkdaşları sərginin keçirildiyi müddətdə bir çox müəssisə və qurumların nümayəndələri ilə görüşlər keçirmiş, yeni təkliflər almışdır. “Spark”, “Sunmar”, “Nurgün”, “İşıq”, “Batu” şirkətləri ilə sazişlərin imzalanması nəzərdə tutulmuşdur.
