Kiçik Qafqazda təbii və antropogen amillərin ətraf mühitdə təsiri öyrənilir
Bakı, 29 yanvar, AZƏRTAC
Kiçik Qafqaz ərazisi mürəkkəb geoloji quruluşu, parçalanmış relyefi və seysmik fəallığı ilə seçilir. Bu səbəbdən bölgədə sürüşmə, uçqun, sel və eroziya kimi təhlükəli geomorfoloji proseslər geniş yayılıb. Yamacların intensiv təsərrüfat məqsədləri üçün istifadə olunması, meşə örtüyünün azalması və yol infrastrukturunun genişlənməsi bu risklərin daha da artmasına səbəb olur. Xüsusilə dağlıq və dağətəyi ərazilərdə, o cümlədən Qarabağda aparılan müşahidələr göstərir ki, antropogen təsir nəticəsində yamacların təbii sabitliyi pozulub və təhlükəli proseslərin intensivliyi yüksəlib.
Elm və Təhsil Nazirliyi Coğrafiya İnstitutunun Geomorfologiya və Paleocoğrafiya laboratoriyasının böyük elmi işçisi, coğrafiya üzrə fəlsəfə doktoru Samirə Abuşova AZƏRTAC-a bildirib ki, aparılan tədqiqatlar Kiçik Qafqazda ekogeomorfoloji şəraitə təbii və antropogen amillərin təsirinin öyrənilməsinə yönəlib. Bu çərçivədə ərazidə sürüşmə, sel, eroziya və digər təhlükəli geomorfoloji proseslər müəyyənləşdirilir və xəritələşdirilir.
Eyni zamanda, relyefin meyilliyi, ekspozisiyası, hündürlüyü və parçalanma dərəcəsi kimi göstəricilər əsasında geomorfoloji risk zonaları qiymətləndirilir və təhlükə səviyyələri müəyyən olunur. Son illər təbiətdən istifadənin artması, iqlim dəyişmələrinin təsirinin güclənməsi və geomorfoloji proseslərin aktivləşməsi bu tədqiqatların aktuallığını daha da artırıb. Sürüşmə, sel və eroziya kimi proseslərin yaşayış məntəqələrinə və infrastruktur obyektlərinə vurduğu ziyan onların vaxtında qiymətləndirilməsini vacib edir.
Bölmənin digər xəbərləri
