“KİRPİ” JURNALININ 50 İLLİYİ QEYD OLUNMUŞDUR
İyulun 19-da Vəcihə Səmədova adına Sərgi salonunda “Kirpi” satirik jurnalının 50 illiyinə həsr edilmiş yubiley mərasimi keçirilmişdir.
Azərbaycan mətbuatı tarixində özünəməxsus yer tutan jurnal cəmiyyətimizdəki mənfi hallara qarşı daim mübarizə aparmış, mənəvi-əxlaqi dəyərlərimizin qorunub saxlanmasında əhəmiyyətli rol oynamışdır.
Mərasimi Azərbaycan Rəssamlar İttifaqınin sədri Fərhad Xəlilov açdı.
Sonra baş redaktor Polad Qasımov jurnalın yarım əsrlik fəaliyyəti haqqında ətraflı məlumat verdi.
Azərbaycan Kütləvi İnformasiya Vasitələri İşçiləri Həmkarlar İttifaqının (AKİVİHİ) sədri, yazıçı Oqtay Salamzadə, “Azərbaycan” qəzetinin baş redaktoru, Milli Məclisin deputatı Bəxtiyar Sadıqov, Azərbaycanın İstanbuldakı baş konsulu, yazıçı Xeyrəddin Qoca, fəlsəfə elmləri namizədi Davud Dəmirli və başqaları mərasimdə çıxış edərək, əlamətdar yubiley münasibətilə jurnalın əməkdaşlarına təbriklərini yetirdilər, onlara yeni yaradıcılıq nailiyyətləri arzuladılar.
Jurnalın bir qrup əməkdaşına AKİVİHİ-nin mükafatları təqdim edildi.
Sonda mərasim iştirakçıları jurnalın ayrı-ayrı nömrələri və onun karikaturaçı rəssamlarının işləri ilə tanış oldular.
Bölmənin digər xəbərləri
