İQTİSADİYYAT
KİV: Bu il dünya bazarında neftin qiymətinə 2 amil təsir göstərəcək
![KİV: Bu il dünya bazarında neftin qiymətinə 2 amil təsir göstərəcək](/files/2024/1/1200x630/17048861771612723491_1200x630.jpg)
Bakı, 10 yanvar, AZƏRTAC
2024-cü ilin birinci yarısına kimi dünya bazarında neftin bir barelinin qiyməti orta hesabla 80 dollara satılacaq.
AZƏRTAC Birləşmiş Ərəb Əmirliklərinin “Al Khaleej” qəzetinə istinadla xəbər verir ki, bu il dünya bazarında neftin qiymətinə iki faktor təsir göstərəcək.
Qəzetin apardığı analizlərə görə, OPEC üzvlərinin qarşılıqlı razılaşma əsasında neft hasilatını azaltmaq ilk faktordur. İkinci faktor isə geosiyasi vəziyyətdir ki, bu da siyasi xarakter daşıyan hərbi münaqişələrin davamından asılıdır.
Belə ki, Qırmızı dənizdə neft tankerləri atəşə tutulduğuna görə Yaxın Şərqdən neftin daşınması üçün alternativ marşrutlardan istifadə olunur ki, bu da nəqliyyat xərcini artırır. Digər tərəfdən ABŞ, İran, Venesuela və Qayananın hasilatı artırmaları neftin dünya bazarında 1 barelinin qiymətini 80, 82 dollar dəyərində saxlayır.
Qəzet yazır ki, ötən ilin sentyabr ayında dünya bazarında 560 milyon barel neft satılıb. Dekabr ayında isə bu rəqəm 171 milyon ton səviyyəsinə düşüb. Bu vəziyyət 2024-cü ildə də davam edəcək. İlin əvvəlindən verilən sifarişlər yerinə yetiriləcək. İlin ikinci yarısında isə satılan neftin həcmi aşağı düşəcək.