KÖÇƏRİ QUŞLARIN OVUNA QADAĞA QÜVVƏDƏ QALIR
Ekologiya və Təbii Sərvətlər Nazirliyi ölkə ərazisində quş qripinin yayılmasının qarşısını almaq məqsədi ilə kompleks tədbirlər görür. Nazirliyin mətbuat xidmətindən AZƏRTAC-ın müxbirinə bildirmişlər ki, Milli Elmlər Akademiyasının və qeyri-hökumət təşkilatlarının iştirakı ilə yaradılmış komissiya köçəri quşların payız miqrasiyasının marşrutunu izləyəcəkdir. Xəstəliyin mümkün mənbələri göstərilən xəritə yaradılması da nəzərdə tutulmuşdur. Nazirliyin əməkdaşları yerli hakimiyyət orqanlarının nümayəndələri ilə birlikdə seromonitorinq keçirəcəkdir. Nazirlik quş qripi ilə əlaqədar ölkədə vəziyyət barədə həftəlik bülleten buraxmaq, maarifləndirmə işlərini genişləndirmək niyyətindədir. Ölkədə xəstəliyin mənbələri olmasa da, Ekologiya və Təbii Sərvətlər Nazirliyi köçəri quşların ovuna ötən il qoyulmuş qadağanı götürmür.
Köçəri quşların miqrasiyası, adətən, avqustda başlanır və yanvarın ortalarında başa çatır.
Bölmənin digər xəbərləri
