DÜNYA
KOFİ ANNAN BEYNƏLXALQ AİLƏ GÜNÜ İLƏ ƏLAQƏDAR MÜRACİƏT ETMİŞDİR
BMT Baş Məclisi 1993-cü ildə mayın 15-ni Beynəlxalq Ailə Günü elan etmişdir.
Baş katib Kofi Annanın BMT-nin Azərbaycandakı ofisi tərəfindən yayılmış müraciətində deyilir ki, bu il qeyd olunan Beynəlxalq Ailə Gününün əsas mövzusu “Ailələr və qocalma: imkanlar və problemlər” dir.
Müraciətdə qocalma problemlərinə dair II Dünya konfransında təsdiq olunmuş faktlar xatırlanaraq bildirilir ki, 2050-ci ildə dünyada ahılların sayı indiki 600 milyondan 3 milyarda çatacaq ki, bu da qloballaşdırmanın, mühacirətin və iqtisadi dəyişikliklərin yayılması şəraitində bəşəriyyət üçün əlavə problemlər yaradacaqdır.
Buna görə də dünya ictimaiyyətinin diqqətini cəmiyyətin əsas sosial dayağı kimi ailənin roluna və inkişaf işində ailə məsələlərinə müvafiq diqqət yetirilməsinin zəruriliyinə yönəltmək lazımdır.
Müraciətin sonunda BMT-nin baş katibi ailələrdə və cəmiyyətdə düzgün həyat tərzini formalaşdırmağı təbliğ etməyə və bu zaman ailənin dayaqlarının möhkəmlənməsində əsas rol oynayan ahılların vasitəçilik rolundan istifadə etməyə çağırır.