Kollektiv Təhlükəsizlik Müqaviləsi Təşkilatı üçtərəfli Bəyanatı alqışlayır
Moskva, 2 fevral, AZƏRTAC
Kollektiv Təhlükəsizlik Müqaviləsi Təşkilatı (KTMT) Azərbaycan, Ermənistan və Rusiya rəhbərlərinin imzaladığı atəşkəs barədə üçtərəfli Bəyanatı alqışlayır.
AZƏRTAC xəbər verir ki, bu barədə təşkilatın Baş katibi Stanislav Zas TASS agentliyində keçirilən brifinqdə bildirib.
O deyib: “Hesab edirəm ki, indiki vəziyyət Qarabağ probleminin dinc yolla həllinə dair razılaşmalara tam nail olmaq üçün şərait yaradır”.
KTMT-nin Baş katibi qeyd edib ki, Qarabağ münaqişəsi zonasında sonuncu hərbi əməliyyatlar dövründə KTMT hərbi əməliyyatların dayandırılmasına və problemin dinc yolla həllinə tərəfdar olub. O, həmçinin xatırladıb ki, KTMT-də olan baza müqaviləsində təşkilatın bu və ya digər dövlətə yardım göstərməsi imkanlarının şərtləri və ardıcıllığı dəqiq qeyd edilib.
S.Zasın sözlərinə görə, Qarabağda hərbi münaqişə - keçən il KTMT-nin Qafqaz regionunda qarşılaşdığı əsas çağırışı olub. KTMT-nin Baş katibi deyib: “Bu, postsovet məkanında ən irimiqyaslı və qanlı qarşıdurma idi. Bildiyiniz kimi, Rusiyanın köməkliyi ilə həmin qarşıdurmanı dayandırmaq mümkün oldu. Atəşkəs və sülhməramlıların yerləşdirilməsi vəziyyəti sabitləşdirdi”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
