“KOLLİZE” JURNALI AZƏRBAYCANDA KEÇİRİLMİŞ REFERENDUMDA ƏHALİNİN YÜKSƏK FƏALLIQ GÖSTƏRDİYİNİ VURĞULAYIR
Parisdə nəşr olunan rüblük “Kollize” jurnalının 36-cı nömrəsində avqustun 24-də ölkəmizdə keçirilmiş referendumla bağlı yazı dərc edilmişdir. Azərbaycan vətəndaşlarının referendumda yüksək fəallıq nümayiş etdirdiklərini vurğulayan jurnal, bunu ölkəmizdə demokratiyanın hərtərəfli inkişafına şərait yaradılması ilə əlaqələndirir.
PARİSDƏ “QIZIL GÜL” FESTİVALINDA İŞTİRAK ETMİŞLƏR
Oktyabrın 13-14-də Parisin “Konfranslar sarayı”nda keçirilmiş “Qızıl gül” gözəllik festivalında dünyanın müxtəlif ölkələrinin tanınmış saç ustaları öz bacarıqlarını nümayiş etdirmişlər. Festivalın münsiflər heyətinə Azərbaycan Modalar Assosiasiyası, Saç Ustaları və Kosmetoloqlar İttifaqının departament müdiri Rəhilə Qasımova da daxil idi.
R.Qasımova AZƏRTAC-ın müxbiri ilə söhbətində bildirmişdir ki, belə bir mötəbər müsabiqədə ölkəmiz ilk dəfə təmsil olunmuşdur. Əsas məqsəd bu sahədə məşhur ustaların zəngin təcrübəsini öyrənib Azərbaycanda tətbiq etməkdən ibarətdir. Respublikamızın nümayəndələri mükafatçılar sırasına çıxmasalar da, qazandıqları xallara görə bəzi ölkələrin təmsilçilərini arxada qoymuşlar. Ümid edirik ki, gələn ilin oktyabrında yenidən Parisdə keçiriləcək müsabiqədə ustalarımızın çıxışı daha uğurlu olacaqdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
