Könüllülər hərtərəfli dövlət qayğısı ilə əhatə olunublar
Bakı, 7 fevral, AZƏRTAC
Ümummilli lider Heydər Əliyevin miras qoyduğu müdrik dövlətçilik ənənəsinin və gənclər siyasətinin layiqli davamçısı Prezident İlham Əliyevin rəhbərliyi ilə təsdiq və icra olunan proqram və strategiyalar gənclərə dövlət qayğısının göstəricisidir.
AZƏRTAC xəbər verir ki, bunu “Könüllüllər ili” çərçivəsində fevralın 7-də Azərbaycan Respublikası Baş Prokurorluğunda keçirilən gənclərlə görüşdə çıxış edən Bakı Dövlət Universitetinin magistr pilləsi üzrə II kurs tələbəsi Erkin Musayev deyib.
Azərbaycan Respublikasının Baş prokuroru tərəfindən 2019-cu il fevralın 6-da təsdiqlənən “Azərbaycan Respublikasının prokurorluq orqanlarında ictimai köməkçilərin fəaliyyəti haqqında” təlimata uyğun olaraq, prokurorluq orqanlarının fəaliyyətində ictimai köməkçi qismində iştirak etmək üçün Baş Prokurorluğa müraciət etdiyini bildirən E.Musayev müraciətinə qısa müddətdə baxıldıqdan sonra fəaliyyətə başlaması üçün müvafiq şəraitin yaradıldığını məmnunluqla qeyd edib.
O, ictimai köməkçi qismində fəaliyyət göstərdiyi müddətdə prokurorluğun fəaliyyət istiqamətləri ilə görülmüş işlərlə yaxından tanış olaraq, yeni bilik və bacarıqlar qazandığını, təhsil aldığı universitetdə öyrəndiyi nəzəri biliklərin praktiki işdə həyata keçirmək imkanı əldə etdiyini vurğulayıb.
E.Musayev könüllülük əsasında prokurorluq orqanlarında ictimai köməkçi qismində fəaliyyət göstərən gənclərin adından onların fəal iştirakı üçün şərait yaratdıqlarına görə Azərbaycan Prezidenti İlham Əliyevə və Baş Prokurorluğun rəhbərliyinə dərin minnətdarlığını bildirib.
Milli Aviasiya Akademiyasının iqtisadiyyat və hüquq fakültəsinin IV kurs tələbəsi, könüllü Aygün Hacıyeva da çıxış edərək ölkəmizdə uğurla həyata keçirilən dövlət gənclər siyasətinin gələcək nəslin intellektual səviyyəsinin artmasına olduqca müsbət təsir göstərdiyini vurğulayıb. O, qürur hissi ilə diqqətə çatdırıb ki, Azərbaycan Prezidenti İlham Əliyevin təşəbbüsü ilə yaradılmış “ASAN xidmət” mərkəzlərindən başlayan könüllülük hərəkatı xalqımızın milli intellektual, innovasiya məhsuludur.
İctimai köməkçi qismində fəaliyyət göstərdiyi müddətdə yeni imkanlar əldə etdiyini vurğulayan A.Hacıyeva prokurorluq orqanlarında kargüzarlığın aparılması qaydalarının, xidməti və prosessual sənədlərin layihəsinin tərtibinə dair təlimatların dərindən öyrənməsi üçün hər cür şəraitin yaradıldığını deyib. O, gənclərə göstərdiyi diqqət və qayğıya görə dövlətimizin başçısına, eləcə də gələcək peşə seçimində doğru yolu seçmək və fəaliyyət istiqamətinə uyğun olaraq, zəngin iş təcrübəsi toplamaq məqsədilə bilik və bacarıqlarını gənclərlə bölüşdüklərinə görə prokurorluq işçilərinə təşəkkürünü bildirib.
Bölmənin digər xəbərləri
