KÜRDƏMİR RAYONUNDA TAXIL SƏPİNİ BAŞA ÇATMIŞDIR
Kürdəmir rayonunun torpaq mülkiyyətçiləri payızlıq taxıl əkinini müvəffəqiyyətlə başa çatdırmışlar.
Rayon icra hakimiyyətinin aqrar şöbəsindən AZƏRTAC-a bildirmişlər ki, əkin sahələri ötən illə müqayisədə 9.400 hektar artaraq 38 min hektara çatdırılmışdır. Bu strateji məhsula diqqətin artırılması ilk növbədə dövlətimizin ölkənin ərzaq təhlükəsizliyində xüsüsi önəm kəsb edən taxılçılığın inkişafına, bu sahədə çalışanlara göstərdiyi qayğı və maddi yardımla əlaqədardır.
Səpində Rusiyadan gətirilmiş və fermerlərə 50 faiz güzəştlə satılmış 120 ton birinci reproduksiyalı, habelə 25 ton elit toxumdan istifadə olunmuşdur ki, bu da gələcək yüksək məhsuldarlıq üçün möhkəm təməldir. Şum altına 110 ton fosfor verilmişdir. Hazırda rayona gətirilmiş 1000 ton azot gübrəsi əkinçilərə paylanır.
Əvvəlki illərdən fərqli olaraq bu kampaniyada “Aqrolizinq” Açıq Səhmdar Cəmiyyətinin xətti ilə gətirilmiş yeni 22 şum traktorunun və 18 səpin aqreqatının gücündən istifadə edilmişdir ki, bu da əkinin daha keyfiyyətlə aparılmasına imkan vermişdir. Rayonun demək olar ki, bütün ərazilərində, xüsusilə daha çox taxıl əkilən Köhünlü, Böyük Kəngərli, Yenikənd kəndlərində, Karrar qəsəbəsində kampaniya daha mütəşəkkil keçmişdir. İlkin səpin aparılmış sahələrdə normal çıxış alınmışdır.
Bölmənin digər xəbərləri
