DÜNYA
KXDR onun peykinə müdaxiləni müharibə elanı kimi qiymətləndirəcək
Bakı, 2 dekabr, AZƏRTAC
Pxenyan Şimali Koreyanın orbitə çıxardığı ilk kəşfiyyat peykinin işinə ABŞ tərəfindən müdaxilə cəhdlərini müharibə elan olunması kimi qiymətləndirəcək.
AZƏRTAC Koreya Mərkəzi Xəbər Agentliyinə istinadla xəbər verir ki, bunu KXDR Müdafiə Nazirliyinin rəsmi nümayəndəsi deyib. Onun sözlərinə görə, ABŞ Kosmik Qüvvələri komandanlığının Şimali Koreya peykinə zərbə endirmək ehtimalının müzakirəsini geri dönməz təsirə səbəb ola biləcəyini bildirib. Belə ki, amerikalı ekspertlər KXDR-ə məxsus peyk və ya yerüstü stansiyaları məhv etməyi, həmçinin onlara qarşı kiber hücumlar həyata keçirməyi təklif edib.
“ABŞ-ın KXDR peykinə qarşı düşmənçilik mövqeyi suverenliyimizə açıq təhdid, daha dəqiq desək, müharibə elanıdır. Əgər Birləşmiş Ştatlar müasir texnologiyadan silah kimi istifadə edərsə və suveren hüquqlarımızı pozarsa biz beynəlxalq və milli normalara uyğun hərəkət edəcəyik. KXDR ABŞ peyklərinə qarşı cavab tədbirlərini nəzərdən keçirəcək”, - deyə Şimali Koreyanın rəsmi nümayəndəsi vurğulayıb.
Qeyd olunub ki, beynəlxalq hüquqa görə kosmosa çıxarılan obyektlər, o cümlədən kəşfiyyat peykləri silah hesab edilmir. Odur ki, Vaşinqton KXDR-in kəşfiyyat peykini “hərbi təhlükə” kimi qəbul etsə, Koreya yarımadasının səmasında dolaşan və əsas strateji obyektləri izləyən çoxsaylı ABŞ peykləri də Pxenyan üçün prioritet hədəf olacaq.
Xatırladaq ki, noyabrın 21-də Şimali Koreya orbitə kəşfiyyat peyki çıxarıb. Buna cavab olaraq, Koreya Respublikası gərginliyi azaltmaq üçün Koreyalararası razılaşmanı qismən dayandırdığını elan edib. KXDR Müdafiə Nazirliyi isə bundan sonra heç bir razılaşmaya əməl etməyəcəyini və sənəddə qadağan olunmuş tədbirlərin tətbiqinə yenidən başlayacağını bildirib.