LƏNKƏRANDA ARIÇILIĞA MARAQ ARTMIŞDIR
Cənub bölgəsinin təbii iqlim şəraiti və bitki örtüyü arıçılığın inkişaf etdirilməsi üçün münbit şərait yaradır. Mütəxəssislərin hesablamalarına görə, təkcə Lənkəranda 10 min arı ailəsi üçün təbii yem bazası mövcuddur. Lənkəranda arıçılıq əsasən dağlıq və dağətəyi ərazilərdə inkişaf etmişdir.
AZƏRTAC xəbər verir ki, arıçılar iqlim dəyişikliyinə çox həssas olan arı ailələrini qışın şaxtasından qorumaq üçün indidən tədbir görürlər. Ciddi nizam-intizamın hökm sürdüyü arı ailəsində işçi arıların gətirdikləri nektardan bal və mum istehsal edilir, mum vasitəsilə yuva daxildən tam qapanır.
Cənub zonasında daha çox məhsuldarlığı ilə fərqlənən Qafqaz cinsi yayılmışdır. Hər arı ailəsindən ildə 50 kiloqramadək bal almaq mümkündür. Lənkəranın meşəlik ərazilərində də minlərlə arı ailəsi yaşayır. Belə ailələr əsasən ağacların oyuqlarında yuva qurur. Arıçılar aşkar etdikləri arı ailələrini ehtiyatla özlərinin hazırladıqları xüsusi yuvalara köçürürlər. Bu, arıların çoxalmasına şərait yaradır. Belə yolla əldə edilən bal daha keyfiyyətli olur.
Bölmənin digər xəbərləri
