LƏNKƏRANDA YENİ AİLƏ QURANLAR ÜÇÜN TƏNTƏNƏLİ NİGAH MƏRASİMİ KEÇİRİLMİŞDİR

03.08.2004 [11:52]
Çap et
A⁺ A^-

AZƏRTAC-ın müxbiri xəbər verir ki, Lənkəran şəhərinin mərkəzində, ümummilli liderimiz Heydər Əliyevin adını daşıyan meydanda yeni ailə quran 12 nəfər üçün təntənəli nigah mərasimi keçirilmişdir.

Mərasimə toplaşanların alqışları və musiqi sədaları altında meydana daxil olan gənclər ulu öndərin portreti önünə gül-çiçək dəstələri qoymuş, burada bir-birlərinə sədaqət andı içmişlər.

Lənkəran rayon nigah evinin direktoru Hökumə Turhidə yeni ailə həyatı quranları təbrik edərək onlara ən xoş arzularını bildirmişdir.

Nigah mərasimində çıxış edən Şəhər İcra Hakimiyyətinin başçısı Zeynal Nağdəliyev gəncləri yeni ailə həyatına başlamaları münasibətilə təbrik etmiş, onlara hədiyyələr təqdim etmişdir.

Sonra rayonun bədii özfəaliyyət kollektivləri rəngarəng konsert proqramı ilə çıxış etmişlər.