Lerikə yağan qar rayonun elektrik təsərrüfatına ciddi ziyan vurmuşdur
Lerik, 17 mart (AZƏRTAC). Martın 16-da axşam saatlarından başlayaraq cənub bölgəsinə yağan qar Lerik rayonunun elektrik təsərrüfatına ciddi ziyan vurmuşdur.
AZƏRTAC xəbər verir ki, qarın qalınlığı rayon mərkəzində 50-60 santimetr, ucqar yaşayış məntəqələrində isə 1 metrə qədərdir.
Yağan qar nəticəsində rayonun bir sıra yaşayış məntəqələrinə elektrik enerjisinin verilməsi kəsilmiş, kəndlərarası yollarda nəqliyyatın hərəkətində problemlər yaranmışdır.
Lerik rayon fövqəladə hallar komissiyasının sədri Habil Məlikovun verdiyi məlumata görə, Lənkəran-Hamarat-Lerik və Masallı-Telavar-Lerik 35 kilovoltluq elektrik hava xətlərində və 10/04 kilovoltluq daxili elektrik hava xətlərində qəza baş verdiyindən rayona elektrik enerjisinin verilməsi tam dayandırılmışdır.
Martın 17-də saat 16.00 radələrində rayonun 162 yaşayış məntəqəsindən 150-nə elektrik enerjisinin verilməsi bərpa edilmişdir. 12 kənd isə hələ də işıqsızdır.
43 nömrəli rayon yol istismar idarəsinin işçiləri Lənkəran-Lerik avtomobil yolunda təmizləmə işlərini davam etdirirlər.
Bölmənin digər xəbərləri
