“LUKOYL” TÜRKİYƏNİN “AKPET” ŞİRKƏTİNİ ALMIŞDIR
AZƏRTAC-ın xüsusi müxbiri xəbər verir ki, Rusiyanın enerji nəhəngi olan “LUKOYL” şirkəti Türkiyənin yanacaqdoldurma məntəqələri şəbəkəsinə sahib olan “Akpet” şirkətinin sahibi olmuşdur.
Bununla bağlı saziş iyulun 28-də İstanbuldakı “Çırağan” sarayında imzalanmışdır.
İmzalanma mərasimindən sonra “LUKOYL”un prezidenti Vahid Ələkbərov jurnalistlərə bildirmişdir ki, “Akpet”in səhmləri ilə bağlı sövdələşmə kommersiya sirri olsa da, müqavilənin dəyərinin 500 milyon dollardan çox olduğunu söyləmək mümkündür. Rəhbərlik etdiyi şirkətin xarici ölkələrdəki yanacaqdoldurma məntəqələrinin sayının 10 minə çatdığını söyləyən “LUKOYL”un sahibi onu da əlavə etmişdir ki, Türkiyədə yeni layihələr həyata keçirəcəkdir.
Yanacaqdoldurma məntəqələrinin yeni sahibi olan “LUKOYL Eurasia Petrol” şirkətinin baş direktoru Fikrət Əliyev tədricən “Akpet” loqotiplərinin dəyişdiriləcəyini və 5 il ərzində bütün məntəqələrin “LUKOYL” adlanacağını bildirmişdir.
Bölmənin digər xəbərləri
