MAGİSTRAL NEFT VƏ QAZ KƏMƏRLƏRİ İLƏ DAŞIMALAR ARTMIŞDIR
Dövlət Statistika Komitəsindən AZƏRTAC-a bildirmişlər ki, 2008-ci ilin 7 ayında yük daşınmasının artımında əsas rol oynamış magistral neft kəmərləri ilə 28,7 milyon ton neft nəql edilmişdir.
Nəqletmənin dörddəüç hissəsi Bakı-Tbilisi-Ceyhan əsas ixrac neft kəməri ilə həyata keçirilmiş və ötən dövrdə Bakıdan 21,8 milyon ton neft ötürülmüşdür. Ümumilikdə, magistral neft kəmərləri ilə nəql edilmiş neftin həcmi əvvəlki ilin eyni dövrü ilə müqayisədə 25,2 faiz artmışdır.
Bu müddətdə magistral qaz kəmərləri ilə 6,2 milyon ton (təqribən 7,75 milyard kubmetr) və ya ötən ilin eyni dövrü ilə müqayisədə 63,3 faiz çox qaz nəql edilmişdir. Nəql edilmiş qazın 29 faizi Bakı-Tbilisi-Ərzurum boru kəməri vasitəsilə həyata keçirilmişdir. Bu kəmər vasitəsilə 2,7 milyard kubmetr qaz ötürülmüşdür.
Bölmənin digər xəbərləri
