Malayziya hökuməti xaricdəki vətəndaşların ölkəyə qayıdışını sadələşdirir
Tokio, 9 iyun, AZƏRTAC
Malayziya hökuməti xaricdəki vətəndaşların koronavirus pandemiyasına görə ölkəyə qayıdışına tətbiq olunan qaydaları sadələşdirib.
AZƏRTAC “The Star” qəzetinə istinadla xəbər verir ki, bu barədə Malayziya Xarici İşlər Nazirliyi iyunun 9-da məlumat yayıb. Bildirilir ki, son aylar xarici ölkələrdə olmuş vətəndaşlar Malayziyanın həmin ölkədəki səfiriliklərinin məktubu olmadan da geri dönə bilərlər. Həmçinin qeyd edilir ki, iyunun 10-dan başlayaraq, Malayziyaya dönən vətəndaşlar dövlət karantin mərkəzlərinə yerləşdirilməyəcəklər və onlar karantini ev şəraitində keçə bilərlər.
Qəzetin yazdığına görə, Malayziya hökuməti tərəfindən karantinin ləğv edilməsi barədə qərar bir sıra ölkələrdə epidemioloji vəziyyətin yaxşılaşması və infeksiyanın yayılmasının nəzarətə alınması ilə əlaqədar qəbul edilib.
Yeni qaydalara əsasən, ölkəyə dönənlər dərhal koronavirus testindən keçməli və öz smartfonlarına onların hərəkətini nəzarətdə saxlamağa imkan verən əlavə yükləməlidirlər. Analizi müsbət olanlar müalicə üçün xəstəxanalara yerləşdiriləcəklər.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
