“Marko Polo” gəmisindən daha çox neft Hanö körfəzinə axıb
Stokholm, 30 oktyabr, Nərgiz Cəfərli, AZƏRTAC
AZƏRTAC-ın daha əvvəl verdiyi xəbərə görə, oktyabrın 22-də səhər İsveçin Karlshamn şəhəri yaxınlığında saya oturan “Marko Polo” sərnişin gəmisindən neft sızması baş vermişdi. O vaxtdan bəri sahil mühafizəsinin işi davam edir.
Oktyabrın 28-də - şənbə günü Blekinq sahili boyunca ümumilikdə 25000 litrə yaxın neft və neft tullantıları utilizasiya edilib. Həftəsonu Sahil Mühafizəsi öz ştatını 50 nəfərədək artırıb. Onların qarşısına qoyulan vəzifə suyu neftdən təmizləmək olub.
Gəmiqayırma şirkətinin təqdim etdiyi plana görə, neft gəmidən boşaldılmalı idi. Saya oturan gəmi güclü küləyin təsirindən yerindən tərpənərək təxminən 100 metr daha dərin sulara üzüb. Nəticədə böyük neft sızması baş verib.
Gecə xilasetmə xidməti Karlshamnda qumlu çimərlikləri yosun, zibil və budaqlardan təmizləyiblər.
Ertəsi gün çimərliklərdə neft aşkarlanmayıb.
Sahil xəttinin təmizlənməsi əməliyyatı ilə yanaşı, neft yayılan ərazinin miqyasını müəyyən etməkdən ötrü təyyarələr və dronların köməyi ilə dənizdə də axtarışlar aparılır.
Bölmənin digər xəbərləri
