MASALLIDA KEÇİRİLƏN TƏLİM KURSU ÖZ İŞİNİ ASTARADA BAŞA ÇATDIRMIŞDIR
Azərbaycanın cənub qapısında narkotiklərin qanunsuz dövriyyəsi ilə mübarizə sahəsində görülən işlərlə yaxından tanış olan kursun iştirakçıları qazandıqları bilikləri təcrübədə tətbiq etmək imkanı əldə etmişlər.
Astara gömrükxanasının akt salonunda təlim kursuna yekun vurulmuşdur.
Mərasimdə BMT-nin Cənubi Qafqazda Narkotiklərə Nəzarət Proqramının milli əlaqələndiricisi Məzahir Əfəndiyev, Avropa Birliyinin eksperti Paul Kuk, narkomanlıqla və narkotik vasitələrin qanunsuz dövriyyəsi ilə mübarizə üzrə Dövlət komissiyasının nümayəndəsi İsrail Əliyev çıxış edərək, kursun başa çatması münasibətilə iştirakçıları təbrik etmiş, cənub bölgəsinin sərhədlərinin möhkəmləndirilməsi, narkotik vasitələrin qanunsuz dövriyyəsi ilə mübarizə sahəsində sərhəd-gömrük və polis işçiləri qarşısında duran vəzifələrdən danışmışlar.
Avropa Birliyinin eksperti Paul Kuk kursu bitirənlərə sertifikatlar təqdim etmişdir.
