MDB ÖLKƏLƏRİNİN BAYTARLARI SAHƏNİN MÜHÜM PROBLEMLƏRİNİ MÜZAKİRƏ EDİRLƏR
Oktyabrın 9-da Bakıda MDB-nin üzvü olan ölkələrin Baytarlıq Sahəsində Əməkdaşlıq üzrə Hökumətlərarası Şurasının iclası öz işinə başlamışdır. Azərbaycan Kənd Təsərrüfatı Nazirliyi, Beynəlxalq Epizootiya Bürosunun Avropa Komissiyası və MDB-nin İcraiyyə Komitəsi tərəfindən təşkil olunmuş iclasın işində Türkmənistan və Ermənistandan savayı, MDB-nin digər bütün ölkələrinin nümayəndə heyətləri iştirak edirlər.
Azərbaycan Kənd Təsərrüfatı Nazirliyi Baş Baytarlıq İdarəsinin rəisi Ramiz Səfərov iclası açaraq, qonaqları təqdim etdi.
Sonra çıxış edən kənd təsərrüfatı naziri İrşad Əliyev Azərbaycanın aqrar sektorunda vəziyyət barədə qonaqlara məlumat verdi. O xatırlatdı ki, SSRİ-i dağılandan sonra iqtisadiyyatın digər sahələrində olduğu kimi, kənd təsərrüfatında da istehsal görünməmiş dərəcədə azalmış və əhalinin ərzaqla təminatında böyük çətinliklər yaranmışdı. Bu isə aqrar bölmədə həyati əhəmiyyət kəsb edən islahatlar aparılmasını tələb edirdi. Azərbaycan Prezidenti Heydər Əliyevin rəhbərliyi ilə 1995-ci ildə bu işə başlandı. İlkin mərhələdə bazar iqtisadiyyatına keçid üçün qanunvericilik bazası yaradıldı. Sonra kolxoz və sovxozlar ləğv edilərək, onların torpağı və əmlakları özəlləşdirildi, təmənnasız və həmişəlik kəndlilərə verildi. Kənd təsərrüfatı məhsulları istehsalçıları, torpaq vergisindən başqa, qalan bütün vergilərdən 5 il müddətinə azad olunmuşlar. Yeni iqtisadi sistemin yaradılması üçün bir çox beynəlxalq təşkilatlar və xarici dövlətlər müxtəlif layihələr həyata keçirmiş, maliyyə yardımı və texniki yardım göstərmiş, sərmayə qoymuşlar. Bütün bu tədbirlər nəticəsində kənd təsərrüfatında böhranın qarşısı alınmış və inkişaf başlanmışdır.
Hazırda kənd təsərrüfatı məhsulları istehsalı ÜDM-in 18-20 faizini təşkil edir.
Nazir ölkəmizdə kənd təsərrüfatı heyvanlarının müxtəlif xəstəliklərdən qorunması məsələsinə toxunaraq, Beynəlxalq Epizootiya Bürosunun üzvü kimi, Azərbaycanda karantinin və xüsusilə təhlükəli xəstəliklərin qarşısının alınması sahəsində görülən işləri, Baytarlıq Xidmətinin öz fəaliyyətini respublikanın qanunvericiliyi və Beynəlxalq Epizootiya Bürosunun tələbləri əsasında həyata keçirdiyini, respublikada fərdi baytarlıq xidmətinin artıq təşəkkül tapdığını bildirdi.
İrşad Əliyev sürətlə yayılan xəstəliklərin vaxtında aşkara çıxarılması və ləğv olunması üçün MDB ölkələri arasında, eləcə də müvafiq beynəlxalq təşkilatlarla əməkdaşlığı genişləndirməyin vacibliyini xüsusi vurğuladı.
Beynəlxalq Epizootiya Bürosu Avropa Regional Komissiyasının prezidenti Nikolay Belev bu təşkilatın fəaliyyətindən və kənd təsərrüfatı heyvanlarının təhlükəli xəstəliklərdən qorunması sahəsində gördüyü tədbirlərdən, Baytarlıq Sahəsində Əməkdaşlıq üzrə Hökumətlərarası Şuranın Katibliyinin rəhbəri Aleksandr Morqunov başçılıq etdiyi qurumun heyətindəki dəyişikliklərdən, MDB-nin üzvü olan ölkələrin dövlət baytarlıq xidmətlərinin rəhbərləri öz respublikalarında heyvandarlıqda epizootik vəziyyətdən, baytarlıq sahəsində əməkdaşlıq haqqında sazişin və Şuranın əvvəlki iclaslarında qəbul olunmuş qərarların, “MDB dövlətlərində dabağ üzrə epizootik vəziyyət və bu xəstəliyin profilaktikası və ləğvi tədbirləri haqqında” MDB Hökumət Başçıları Şurasının qərarının həyata keçirilməsinin gedişindən danışdılar.
Fasilədən sonra Litva və Estoniyada epizootik vəziyyət haqqında məlumat və bir sıra digər məruzələr dinlənildi.
İclas oktyabrın 10-da öz işini yekunlaşdıracaqdır.
Bölmənin digər xəbərləri
