MƏDƏNİYYƏT VƏ TURİZM NAZİRLİYİ YENİ MÜSABİQƏ ELAN ETMİŞDİR
AZƏRTAC xəbər verir ki, Azərbaycan Respublikası Mədəniyyət və Turizm Nazirliyi yeni müsabiqə keçiriləcəyini elan etmişdir. 2008-ci il sentyabrın 1-dən 2009-cu il aprelin 1-nə qədər davam edəcək bu müsabiqədə qələbə uğrunda dramaturqlar mübarizə aparacaqlar. İddiaçıların yaş “senzi” də müəyyən edilmişdir - yaşı 35-dən yuxarı olan şəxslər müsabiqəyə buraxılmır.
Tələblər ənənəvidir: dram əsərləri yüksək bədii səviyyəsi və məzmunu ilə seçilməlidir.
Müsabiqədə iştirak etmək üçün nazirliyə təqdim edilən sənədlər iki zərfə qoyulmalıdır. Birinci zərfdə əsərin kompyuterdə yığılmış mətni (imzasız) və müəllifin tərtib etdiyi bir səhifəlik annotasiya, ikinci zərfdə isə müəllifin şəxsiyyətini təsdiq edən sənədlərin surəti, onun adı (ədəbi təxəllüsü), ev ünvanı və əlaqə telefonları göstərilən sənəd olmalıdır.
Müsabiqənin münsiflər heyəti tərəfindən seçiləcək üç ən yaxşı əsər Mədəniyyət və Turizm Nazirliyi tərəfindən alınacaq və müxtəlif teatrların səhnələrində tamaşaya qoyulmaq üçün tövsiyə ediləcəkdir.
Bölmənin digər xəbərləri
