Bakı, 5 yanvar, AZƏRTAC

Heydər Əliyev Sarayı - paytaxtımızın memarlıq simasında xüsusi yeri olan bu möhtəşəm məkan həm də ölkəmizdə mühüm tədbirlərin keçirildiyi baş səhnə, əsas konsert salonudur. İctimai-siyasi, mədəni-kütləvi tədbirlərə 45 ildir ev sahibliyi edən, Azərbaycan xalqının həyatında önəmli hadisələri, tədbirləri səhnəsindən geniş tamaşaçı kütləsinə çatdıran saray bu gün də qaynar həyatını yaşayır.

Yüksək səviyyəli təmir-bərpadan sonra yenidən qapılarını tamaşaçıların üzünə açan Heydər Əliyev Sarayı 2017-ci ildə 45 yaşını zəngin tədbirlərlə qeyd edib. Əlbəttə, sarayın davamlı olaraq öz tamaşaçılarına və Azərbaycana gələn xarici qonaqlara keyfiyyətli xidmət göstərməsində bu mədəniyyət müəssisəsinin fəaliyyətə başladığı gündən burada müxtəlif vəzifələrdə çalışan və 1989-cu ildən ona rəhbərlik edən Əməkdar Mədəniyyət İşçisi Fərhad Babayevin rolu və əməyi danılmazdır. Ömrünün 45 ilini bu saraya həsr edən Fərhad müəllimin yanvarın 5-də 70 yaşı tamam olur.

AZƏRTAC bu münasibətlə Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının üzvü, “Azərbaycan Jurnalistlər Şəbəkəsi” İctimai Birliyinin sədri Ayaz Mirzəyevin yubilyara həsr etdiyi yazını təqdim edir.

Yüksək intellektə və bacarığa malik Fərhad müəllimin gərgin əməyi və zəhməti nəticəsində Heydər Əliyev Sarayı bu gün də ölkənin bir nömrəli sarayı adını qoruyub saxlaya bilir. Onu yaxından tanıyan bir insan kimi tam əminliklə deyə bilərəm ki, Fərhad müəllim bütün konsertləri şəxsən izləyir. Hətta o, afişalara baxmadan da hansı tarixdə hansı tədbirin olduğunu sizə deyə bilər. O, təkcə tədbir və konsertləri deyil, həm də tamaşaçıları izləyir. Çünki məhz tamaşaçıların əhval-ruhiyyəsi Fərhad müəllim üçün əsas göstərici və vacib şərtdir. Hər zaman işinin başında olan Fərhad Babayev hamıdan əvvəl işə gəlib, hamıdan sonra işdən gedir. Bunun səbəbini soruşanda isə Fərhad müəllim etiraf edir ki, ortaya çıxa biləcək hər hansı məsələnin həllinə və hər şeyin yüksək səviyyədə təşkilinə, ilk növbədə, o, cavabdehdir.

Qısa haşiyə çıxaq ki, ümummilli lider Heydər Əliyev respublika rəhbərliyinə gəldiyi ilk günlərdən bir çox tikinti işləri ilə yanaşı, indi onun adını daşıyan bu möhtəşəm sarayın tikintisi ilə də maraqlanıb və binanın başa çatdırılması üçün xüsusi göstərişlər verib. Beləliklə, sarayın illərlə ləngiyən tikintisi Ulu Öndərin qayğısı nəticəsində iki ilə başa çatıb və 1972-ci il dekabrın 11-də təhvil verilib. Üç gün sonra isə saray öz qapılarını tamaşaçıların üzünə açıb. O tarixi gündən 45 il keçsə də, bu gün Azərbaycan incəsənətinin nümayiş olunduğu əsas səhnə məhz bu məkan - Heydər Əliyev Sarayıdır. İndi Fərhad Babayevin rəhbərlik etdiyi bu səhnə bir çox möhtəşəm hadisələrə şahidlik edib. Xalqımızın böyük oğlu, Ulu Öndərin mədəniyyət sahəsinə sonsuz diqqəti və qayğısı bu saraya münasibətdə də hər zaman aydın nəzərə çarpıb. Elə bu səbəbdən də mədəniyyət ocaqları sırasında özünəməxsus yeri olan bu mərkəzi konsert salonu öz qurucusunun - ümummilli lider Heydər Əliyevin adını daşıyır.

Nəhayət, bu möhtəşəm saray özünün ikinci həyatına Prezident İlham Əliyevin diqqət və qayğısı ilə qədəm qoyub. Onun müvafiq qərarı ilə yüksək səviyyədə əsaslı təmir-bərpa olunan saray ümumilikdə dövlətimizin mədəniyyətə, onun inkişafına göstərdiyi münasibətin bariz nümunəsidir.

Bunun nəticəsidir ki, bu gün paytaxtımızın, ölkəmizin rəmzlərindən birinə çevrilən bu konsert müəssisəsi özünün gözəlliyi və möhtəşəmliyi ilə dünyanın seçilən mədəniyyət məkanları ilə bir sırada dayanır. Bu gün bir çox milli mənəvi dəyərlərimiz - muğam musiqisi, aşıq sənəti UNESCO-nun mədəni irs siyahısında yer alıb. Fərhad Babayevin peşəkarlıqla rəhbərlik etdiyi Heydər Əliyev Sarayı isə mədəniyyətimizin incisi hesab olunan bu sənət sahələrinin təbliği yönündə hər zaman çalışıb. Mədəniyyət ocağının tarixi yaddaşına nəzər yetirsək, müxtəlif dövlət əhəmiyyətli, beynəlxalq miqyaslı mərasimlərə, eləcə də insanların mədəni istirahətini təmin edən tədbir və konsertlərə ev sahibliyi etdiyini görərik. Məlumdur ki, Ulu Öndər bu sarayda xalq qarşısında and içərək Prezident kimi ilk nitqini söyləyib. Onun layiqli davamçısı İlham Əliyev də ölkə başçısı seçilərkən xalqa məhz bu məkandan səslənib. Azərbaycanın bir çox dövlət əhəmiyyətli tədbirləri Heydər Əliyev Sarayının ev sahibliyi ilə reallaşıb. İndinin özündə də Fərhad Babayevin rəhbərliyi ilə saray hər mövsümə böyük məsuliyyətlə, yüksək səviyyədə hazırlaşır.

Görkəmli musiqiçilərin yubileyləri, ənənəvi Bakı Caz festivalları, tanınmış müğənnilərin solo konsertləri bu sarayın bizə təqdim etdiyi mədəni proqramların yalnız bir hissəsidir. Son illər saray tərəfindən reallaşdırılan layihələrdə milli musiqimizin təbliği və bu sahədə gənc istedadların təqdimatı xüsusi nəzərə çarpır. Şərqin ən qədim musiqi janrlarından olan, xalqımızın mədəniyyətində, mənəvi dünyasında mühüm rol oynayan muğam sənəti daim saray rəhbərliyinin diqqət mərkəzindədir. Məhz Fərhad Babayevin təşəbbüsü, Heydər Əliyev Sarayının təşkilatçılığı ilə artıq bir neçə ildir ki, “Gəncləşən muğam” adlı layihə hazırlanaraq yüksək səviyyədə təqdim olunub. Əlbəttə, reallaşan bu tipli layihənin əsas məqsədi gənc muğam ifaçılarının tanınması və təbliğidir. Təbii ki, saray yalnız muğam ifaçılarına deyil, digər sənətçilərə də dəstək olur. Aşıq sənətinin layiqli davamçıları da mütəmadi olaraq bu səhnədə öz istedad və bacarıqlarını göstərmək imkanı əldə edirlər. Media nümayəndələrinə müsahibələrində Fərhad müəllim bildirib ki, sarayın repertuarını müəyyənləşdirərkən daha çox Azərbaycanın milli musiqisi, folklor sənət sahələri ilə yanaşı, müasir mədəniyyətdən də bəhrələnirlər. Hər bir yaş təbəqəsinin istəyi nəzərə alındığı üçün müasir dövrün tələblərinə uyğun musiqi janrlarının təbliği istiqamətində də tədbirlər təşkil edilir. Bir sözlə, Fərhad Babayevin rəhbərlik etdiyi kollektivin bir missiyası var: hər kəsin marağını nəzərə almaqla milli mənəvi dəyərlərimizi əks etdirərək fəaliyyət göstərmək. Görünən də odur ki, Fərhad Babayevin rəhbərlik etdiyi saray ölkənin mərkəzi konsert salonu olaraq, ölkə əhəmiyyətli və eyni zamanda, vətəndaşların istəklərinə uyğun tədbirlərə yer verir. Xüsusilə, son illər tamaşaçıların artan tələbatını ödəmək və zövqünü oxşamaq məqsədilə xeyli sayda müasir texniki avadanlıq - səhnənin qalxıb-enən döşəməsi, hər iki istiqamətdə hərəkət edən transpartör lenti, konsert proqramının daha yüksək səviyyədə keçirilməsi üçün dünya standartlarına uyğun işıq və səs texnikası müxtəlif xarici ölkələrdən, o cümlədən Birləşmiş Ştatlar, Kanada və Yaponiyadan gətirilərək qurulub.

İstər sarayın təşkil etdiyi tədbirlər, istərsə də dövlət əhəmiyyətli mərasimlər, konsertlər zamanı Fərhad Babayevin rəhbərlik etdiyi kollektiv işinə eyni dərəcədə böyük məsuliyyətlə yanaşır. Çünki bu sarayın adı onun məsuliyyət yükünü daha da artırır.

Ömrünün 45 ilini məhz bu saraya həsr edən hörmətli Fərhad müəllim 2018-ci il yanvarın 5-i 70 yaşını qeyd edəcək. Mən şəxsən öz adımdan və təmsil etdiyim media sahəsinin təmsilçiləri adından bu dəyərli insanı yubiley münasibətilə səmimiyyətlə təbrik edir, ona möhkəm can sağlığı, uzun ömür, çoxşaxəli fəaliyyətində yeni uğurlar arzulayıram. İnanıram ki, məhz onun rəhbərliyi altında bu saray daha çox yaradıcılıq uğurları əldə edəcək, ən əsası isə qazandığı etimadı daim doğruldacaq.