DÜNYA
Media: “Boeing” əməkdaşları yeddi həftə sürən tətili dayandıracaqlar
Bakı, 5 noyabr, AZƏRTAC
“Boeing” korporasiyasının tətil edən əməkdaşlarının yarıdan çoxu (59 faizi) təyyarə istehsalçısı ilə yeni maaş müqaviləsini qəbul edib.
AZƏRTAC “Reuters” agentliyinə istinadla xəbər verir ki, bu, yeddi həftə davam edən və istehsalın dayandırılmasına səbəb olan tətilə son qoyub. Yeni saziş korporasiya işçilərinin maaşlarının növbəti dörd il ərzində 38 faiz artırılmasını nəzərdə tutur. Tətildə iştirak edən əməkdaşlar noyabrın 12-dək öz işlərinə qayıtmalıdır. Lakin təyyarə istehsalının tam bərpası və “Boeing” korporasiyasının maliyyə böhranından çıxması həftələr çəkə bilər.
Agentliyin məlumatına görə, yeni dördillik müqavilənin sonunda “Boeing” işçilərinin orta illik əməkhaqqı əvvəlki 75,6 min dollardan 119,3 min dollara qalxacaq. Bundan öncə tətil iştirakçıları əməkhaqqının artırılması ilə bağlı korporasiya tərəfindən irəli sürülən iki təklifi rədd etmişdi. İşçilərin ilkin tələbi üç il ərzində maaşların 40 faiz artırılması idi.
ABŞ Prezidenti Cozef Bayden “Boeing” əməkdaşlarının maraqlarını təmsil edən Beynəlxalq Maşinistlər və Aerokosmik İşçilər Assosiasiyasını və kompaniyanı konsensusa nail olduqlarına görə təbrik edib.
Xatırladaq ki, sentyabrın 13-də “Boeing” zavodlarında çalışan 33 min işçi kompaniyanın dörd il ərzində əməkhaqqını 25 faiz artırmaq barədə təklifini rədd etmişdi.
Bölmənin digər xəbərləri
