Mehmet Seven: Azərbaycan və Türkiyənin qətiyyətli mövqeyi Makronun bölgə planlarını iflas etdirdi
Bakı, 14 may, AZƏRTAC
Makron administrasiyasının xüsusilə Cənubi Qafqaz siyasətində yol verdiyi strateji səhvlər Parisin regiondakı təsir imkanlarını minimum səviyyəyə endirib. Fransa rəhbərliyi uzun müddətdir Cənubi Qafqazda balanslı siyasət yürütmək əvəzinə, açıq şəkildə Ermənistanın maraqlarını müdafiə edən xətt seçib. Bu yanaşma Fransanın beynəlxalq vasitəçilik missiyasına ciddi zərbə vurub və Parisi region ölkələri üçün etibarsız tərəfdaşa çevirib.
Bu fikirləri AZƏRTAC-a açıqlamasında türkiyəli siyasi ekspert Mehmet Seven bildirib.
Onun sözlərinə görə, Prezident Emmanuel Makronun daxili siyasətdə yaşadığı uğursuzluqlar onun xarici siyasətdə daha sərt və emosional addımlar atmasına səbəb olur.
“Makron administrasiyası Azərbaycan və Türkiyənin bölgədə formalaşdırdığı yeni reallıqları qəbul etmək istəmir. Halbuki Prezident İlham Əliyevin rəhbərliyi ilə Azərbaycan beynəlxalq hüquqa əsaslanaraq öz ərazi bütövlüyünü təmin edib və regionda tamamilə yeni siyasi mərhələ formalaşdırıb. Azərbaycanın tarixi qələbəsi yalnız region üçün deyil, bütövlükdə beynəlxalq münasibətlər sistemi üçün mühüm dönüş nöqtəsi oldu. Bakı uzun illər kağız üzərində qalan BMT Təhlükəsizlik Şurasının qətnamələrinin icrasını özü təmin etdi və bununla beynəlxalq hüququn işlək mexanizm olduğunu praktik olaraq nümayiş etdirdi. Fransa isə bu prosesdə obyektiv mövqe tutmaq əvəzinə, anti-Azərbaycan ritorikasını gücləndirdi”, - deyə ekspert vurğulayıb.
Türkiyəli ekspert hesab edir ki, Makronun Ermənistana səfərini Türkiyə üzərindən həyata keçirmək istəyi də sıradan diplomatik məsələ deyildi: “Bu addımın arxasında siyasi mesaj və bölgədə psixoloji üstünlük nümayiş etdirmək cəhdi dayanırdı. Makron düşünürdü ki, Türkiyə üzərindən Ermənistana gedərək həm Ankaraya, həm də Bakıya siyasi mesaj verə biləcək. Lakin Prezident Rəcəb Tayyib Ərdoğan və Prezident İlham Əliyevin qətiyyətli və prinsipial mövqeyi bu planları puça çıxardı. Bu hadisə bir daha göstərdi ki, artıq regionda əsas söz sahibi Azərbaycan və Türkiyə tandemidir. Zəngəzur dəhlizi, Orta Dəhliz və enerji layihələri kimi təşəbbüslər Türk dünyasının inteqrasiyasını sürətləndirir və Avrasiya məkanında yeni iqtisadi xəritə formalaşdırır. Bu isə bəzi Qərb dairələrinin ciddi narahatlığına səbəb olur. Fransa rəhbərliyi məhz bu səbəbdən Türkiyə və Azərbaycana qarşı daha aqressiv ritorika nümayiş etdirir. Lakin bu siyasət Parisə heç bir üstünlük qazandırmır. Makron administrasiyası anlamalıdır ki, Cənubi Qafqazda köhnə təsir mexanizmləri artıq işləmir. Region xalqları öz taleyini özü müəyyən edir. Xarici müdaxilə cəhdləri, ikili standartlar və qərəzli yanaşmalar isə heç bir nəticə verməyəcək”.
Mehmet Seven bildirib ki, Fransa uzun illər ATƏT-in Minsk qrupu çərçivəsində də real nəticə əldə edə bilmədi. Onun sözlərinə görə, həmsədr dövlətlər, xüsusilə Fransa münaqişənin həllində maraqlı olmaq əvəzinə, status-kvonun qorunmasına xidmət edən siyasət yürüdürdülər.
“Azərbaycan Prezident İlham Əliyevin liderliyi ilə regionda yeni siyasi və hüquqi reallıq yaradıb və artıq dünya dövlətləri bu reallığı qəbul etməyə başlayıblar. Türkiyə Prezidenti Rəcəb Tayyib Ərdoğanın qətiyyətli dəstəyi isə Azərbaycan-Türkiyə qardaşlığını beynəlxalq münasibətlər sistemində mühüm strateji faktora çevirib. Fransa rəhbərliyi bölgədə davamlı sülh və əməkdaşlıq istəyirsə, ilk növbədə qərəzli siyasətdən imtina etməli və region ölkələrinin suveren hüquqlarına hörmətlə yanaşmalıdır”, - deyə Mehmet Seven qeyd edib.
Bölmənin digər xəbərləri
