Mərkəzi Seçki Komissiyasının sədri Avstriyada seçkilər mövzusunda seminarda iştirak edib
Vyana, 21 iyul, AZƏRTAC
Azərbaycan Respublikası Mərkəzi Seçki Komissiyasının (MSK) sədri Məzahir Pənahovun rəhbərlik etdiyi nümayəndə heyəti Vyanada seçkilər mövzusunda keçirilən seminarda iştirak edib.
ATƏT-in hazırkı sədrliyi və Demokratik Təsisatlar və İnsan Hüquqları Bürosu tərəfindən birgə təşkil edilən, seçki idarəetmə qurumlarının və beynəlxalq təşkilatların rəhbərlərinin qatıldığı seminar seçkilərlə bağlı müxtəlif məsələlərin və ölkələrin əldə etdiyi yaxşı təcrübələrin müzakirəsinə həsr olunub. Ümumi və bərabər seçki hüququ və seçkilərin müşahidəsi seminarda müzakirəyə çıxarılan əsas mövzular sırasında olub.
Səfər ATƏT-in Demokratik Təsisatlar və İnsan Hüquqları Bürosunun direktoru Mixael Linkin dəvəti ilə baş tutub. Məzahir Pənahovun səfər çərçivəsində Mixael Link ilə görüşündə qarşılıqlı maraq doğuran bir sıra məsələlər ətrafında fikir mübadiləsi aparılıb.
MSK sədri müxtəlif ölkələrin seçki idarəetmə qurumlarının və beynəlxalq təşkilatların rəhbərləri ilə, digər rəsmi şəxslərlə də görüşlər keçirib, qurumlararası əlaqələr və s. məsələlər müzakirə olunub.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
