Məşğulluq orqanları 200 mindən çox şəxsin məşğulluğuna dəstək göstərəcək
Bakı, 7 fevral, AZƏRTAC
Əmək və Əhalinin Sosial Müdafiəsi Nazirliyinin məşğulluq orqanları tərəfindən bu il işlə təmin olunanların sayının 30 faiz artırılmaqla 130 minə çatdırılması, peşə hazırlığına cəlb olunanların sayının 40 faizdən çox artırmaqla 5 minə çatdırılması nəzərdə tutulur.
AZƏRTAC xəbər verir ki, bunu Əmək və Əhalinin Sosial Müdafiəsi naziri Sahil Babayev kütləvi-informasiya vasitələrinə verdiyi müsahibədə deyib. Nazir bununla bərabər, 2020-ci ildə özünüməşğulluq proqramının əhatə dairəsinin daha da genişləndirilməsinin nəzərdə tutulduğunu, bu sahədə Dünya Bankı ilə də əməkdaşlığın həyata keçiriləcəyini də bildirib.
S.Babayev deyib ki, ödənişli ictimai işlərlə təminat proqramı da genişlənəcək. Ümumilikdə, bu il 12 minədək ailənin özünüməşğulluq proqramına, 64 min nəfərin də ödənişli ictimai işlərə cəlb edilməsi təmin olunacaq.
Beləliklə, builki hədəf nazirliyin məşğulluq orqanları tərəfindən 200 mindən çox şəxsin məşğulluğuna dəstək göstərməkdir.
Bölmənin digər xəbərləri
