MƏTBUAT ŞURASI İŞÇİ QRUPUNUN NÖVBƏTİ TOPLANTISI KEÇİRİLMİŞDİR
Mətbuat Şurasının formalaşdırılması və jurnalistlərin birinci qurultayına hazırlıq məqsədi ilə yaradılmış işçi qrupunun növbəti toplantısı olmuşdur. Dekabrın 14-də Bakı Mətbuat Klubunda keçirilən toplantıda müzakirəyə hansı məsələlər çıxarılmışdır? AZƏRTAC-ın müxbirinin bu sualını işçi qrupunun üzvü, “İki sahil” qəzetinin redaktoru, Milli Məclisin deputatı Vüqar Rəhimzadə şərh edərək demişdir ki, tədbirdə qrup tərəfindən kütləvi informasiya vasitələrinə paylanmış anketlərə verilmiş cavablar, Mətbuat Şurasının bina və maliyyə məsələləri, qurultayın keçiriləcəyi yer və jurnalistlərin bu ali forumunda iştirak edəcək nümayəndələrin sayı və digər məsələlər müzakirə olunmuşdur. İşçi qrupu paylanmış anketlərə indiyədək 65 cavab almışdır. Bu cavabları mətbuat orqanları, jurnalist təşkilatları və informasiya agentlikləri göndərmişlər. Biz belə hesab edirik ki, növbəti toplantıya qədər 100-dən çox KİV-dən cavab alacağıq.
Mətbuat Şurasının nizamnamə layihəsinin də hazırlandığını bildirən V.Rəhimzadə ilkin variant üçün bir sıra redaksiyalar tərəfindən kifayət qədər təkliflər irəli sürüldüyünü demişdir. O qeyd etmişdir ki, bütün mətbuat orqanlarının, jurnalist təşkilatlarının bu işdə fəallığı son dərəcə vacibdir. Çünki söhbət milli jurnalistikamızın inkişafına təkan verəcək vacib bir məsələdən gedir. Nizamnamə layihəsi ilə bağlı redaksiyalardan daxil olmuş təkliflər və əlavələr növbəti toplantıların birində ətraflı müzakirə olunacaq, obyektiv və faydalı təkliflər nizamnamədə öz əksini tapacaqdır.
İşçi qrupunun növbəti yığıncağı gələn il yanvarın 4-də keçiriləcəkdir.
Bölmənin digər xəbərləri
