METRONUN “NİZAMİ” STANSİYASI TƏMİR ÜÇÜN BAĞLANACAQ
Bakı metropoliteninin texniki şöbəsindən AZƏRTAC-a bildirmişlər ki, avqustun 8-də metronun “Nizami” stansiyası təmir üçün müvəqqəti olaraq bağlanacaqdır. Buna səbəb təxirəsalınmaz təmir-texniki işlərdir. Bu işlər avqustun 12-dək başa çatdırılacaqdır. 1975-ci ildə stansiya tikiləndə vestibülün və eskalatorların üstündə asbest-şifer konstruksiyalardan ibarət tavanlar quraşdırılmışdır. Ötən 27 il ərzində tavanlar korroziyaya məruz qalmış, mənəvi və texniki cəhətdən köhnəlmişdir. Ona görə də, mütəxəssislərin fikrincə, onları dəyişdirmək lazım gəlir. Təmir işləri metropolitenin xidmətindən istifadə edənlər üçün təhlükəli olduğuna görə, stansiyanı müvəqqəti olaraq bağlamaq qərara alınmışdır.
Köhnə tavanlar düralümindən hazırlanmış konstruksiyalarla əvəz ediləcəkdir. Bundan əlavə, stansiyanın estetik görünüşü dəyişəcək, sərnişinlərə xidmət mədəniyyəti yüksələcəkdir.
Xatırladaq ki, belə tavanlar Moskva metropoliteni stansiyalarının çoxunda quraşdırılmışdır.
“Nizami” stansiyası avqustun 12-də yenidən sərnişinləri qəbul edəcəkdir.
Bölmənin digər xəbərləri
