İQTİSADİYYAT
Milli Bankın Mətbuat Xidmətinin məlumatı
Azərbaycan Respublikası Milli Bankı İdarə Heyətinin bu ilin birinci yarısının nəticələrinə həsr olunmuş geniş iclası keçirilmişdir.
İclasda Milli Bankın bütün struktur bölmələri rəhbərlərinin və müvafiq kuratorların altı ay ərzində həm cari, həm də taktiki iş planlarının icrası barədə hesabatları dinlənilmiş, prioritet layihələr üzrə ayrı-ayrı layihə qruplarının fəaliyyəti müzakirə olunmuşdur.
Müzakirələrdə birinci yarımildə pul-kredit siyasətinin əsas nəticələri, pul proqramının parametrləri, Milli Bankın maliyyə yekunları, bank sistemində mühasibat uçotunun beynəlxalq standartlara uyğunlaşdırılması üzrə aparılan islahatların vəziyyəti təhlil edilmiş, milli ödəniş sisteminin inkişafı və təkmilləşdirilməsi problemləri, bank nəzarətinin və bank qanunvericiliyinin beynəlxalq standartlara uyğunlaşdırılması, pul dövriyyəsinin yaxşılaşdırılması, habelə Milli Bankın fəaliyyətinin digər istiqamətləri üzrə görülən işlərə yekun vurulmuş, bu istiqamətlərdə ayrı-ayrı struktur bölmələrin fəaliyyəti İdarə Heyətinin Sədri Elman Rüstəmov tərəfindən qiymətləndirilmişdir.
İclasda qarşıdakı növbəti ikinci yarımillik üçün vəzifələr bir daha dəqiqləşdirilmiş, strateji və taktiki planlaşdırma çərçivəsində ilin sonunadək müəyyən edilmiş məqsədlərin yerinə yetirilməsi üçün əlavə göstərişlər verilmişdir.