MİLLİ DRAM TEATRI YENİ TAMAŞA HAZIRLAYIR
Satirik hekayələrdən ibarət bir neçə kitabın müəllifi yazıçı Xeyrəddin Qoca “Hərənin öz payı...” adlı iki hissəli komediya yazmışdır. Əsərdə cəmiyyətdəki mənfi tiplər - yaltaqlar, fırıldaqçılar, əliəyrilər, nadanlar, cahillər, dəstəbazlar, dostbazlar, partiyabazlar, istehzalı gülüşlə qamçılanır, nöqsanlar, çatışmazlıqlar məharətlə açılıb göstərilir. Demokratiya pərdəsi altında Prezident olmaq istəyən iki partiya lideri özlərini gülünc vəziyyətə qoyurlar.
Azərbaycan Akademik Milli Dram Teatrının Bədii Şurası yazıçı Xeyrəddin Qocanın “Hərənin öz payı...” komediyasını tamaşaya qoymaq üçün qəbul etmişdir. Yeni əsərin quruluşçu rejissoru xalq artisti Mərahim Fərzəlibəyovdur. Tamaşaya musiqini bəstəkar Eldar Mansurov yazır. Rəssam İlqar Ələkbərovdur. Rollar üzərində Siyavuş Aslan, Yaşar Nuri, İlham Namiq Kamal, Zərnigar Atakişiyeva, Cəfər Əhmədov, İlham Əsgərov, Hacı İsmayılov, Bürcəli Əsgərov, Rafiq Əzimov və başqaları işləyirlər.
Tamaşa oktyabr ayının ortalarında göstəriləcəkdir.
Bölmənin digər xəbərləri
