Bakı, 29 noyabr, AZƏRTAC 

Noyabrın 29-da Milli Məclisin növbəti iclası keçirilib.

AZƏRTAC xəbər verir ki, iclası açan Milli Məclisin sədri Oqtay Əsədov gündəliyi təqdim edib.

Əvvəlcə deputatlar cari məsələlərlə bağlı fikirlərini bildiriblər.

İclasda Azərbaycan-Rusiya münasibətləri, eləcə də Ermənistan-Azərbaycan, Dağlıq Qarabağ münaqişəsi, Xocalı soyqırımı barədə fikir və təkliflər səsləndirilib.

Sonra gündəlikdə olan “Azərbaycan Respublikası Hökuməti ilə Almaniya Federativ Respublikası Hökuməti arasında diplomatik nümayəndəlik və ya konsulluq əməkdaşlarının ailə üzvlərinin ödənişli əmək fəaliyyəti haqqında” Saziş təsdiq edilib. Sazişdə bildirilir ki, Almaniyada ödənişli əmək fəaliyyəti ilə məşğul olmağa başladıqları zaman müvafiq şəxslər yaşama icazəsi almaq tələbindən azad edilirlər. Azərbaycanda isə müvafiq yaşama icazəsi zəruri olduğu təqdirdə verilir.

İclasda “Serbiya Respublikasında E-763 avtomobil magistralının Lyiq-Bolykovtsi, Bolykovtsi-Takovo və Takovo-Prelyina hissələrinin tikintisinin maliyyələşdirilməsi üçün borcverən qismində çıxış edən Azərbaycan Respublikası Hökuməti və borcalan qismində çıxış edən Serbiya Respublikası Hökuməti arasında 2012-ci il 2 fevral tarixində imzalanmış Kredit Sazişində dəyişikliklər edilməsi haqqında” Sazişin təsdiq edilməsi barədə qanun layihəsinə də baxılıb. Sənəddə bildirilir ki, Serbiya Respublikası borcverəndən layihənin başa çatdırılması və tikinti müqaviləsi üzrə öhdəliklərə tam şəkildə əməl və riayət edilməsinin davam etdirilməsi üçün kreditdən istifadə müddətinin 2017-ci il mayın 4-dək uzadılmasını xahiş edib. Tərəflər kredit sazişi üzrə kreditdən istifadə müddətinin bu Sazişdə təsbit edildiyi şəkildə uzadılması barədə razılığa gəliblər. Saziş layihəsi təsdiq edilib.

Milli Məclisin sədri Oqtay Əsədov bildirib ki, “Reklam haqqında” qanuna uyğunlaşdırma məqsədilə bir paketdə Milli Məclisə bir neçə qanuna əlavə və dəyişikliklər edilməsi ilə bağlı qanun layihələri göndərilib. Bunlar “İnsan orqan və (və ya) toxumalarının transplantasiyası haqqında”, “Tütün və tütün məmulatı haqqında”, “Bələdiyyələrin statusu haqqında”, “Körpələrin və erkən yaşlı uşaqların qidalanması haqqında”, “Azərbaycan Respublikasında dövlət dili haqqında”, “Poçt haqqında”, “Çayçılıq haqqında”, “Narkotik vasitələrin, psixotrop maddələrin və onların prekursorlarının dövriyyəsi haqqında”, “Teatr və teatr fəaliyyəti haqqında”, “Dərman vasitələri haqqında”, “Bədən tərbiyəsi və idman haqqında” qanunlarda dəyişikliklər edilməsi barədə qanun layihələridir. Sonra qanun layihələri ayrılıqda səsə qoyularaq təsdiq edilib.

İclasda “Normativ hüquqi aktlar haqqında” Azərbaycan Respublikasının Konstitusiya Qanununun tətbiqi ilə əlaqədar “Ailə kəndli təsərrüfatı haqqında”, “Atçılıq haqqında”, “Xaricdə yaşayan azərbaycanlılarla bağlı dövlət siyasəti haqqında” və “Hidrometeorologiya fəaliyyəti haqqında” qanunlarda dəyişikliklər edilməsi barədə qanun layihələri də qəbul edilib.

Sonra Milli Məclisin hüquq siyasəti və dövlət quruculuğu komitəsinin sədri Əli Hüseynli Azərbaycan Respublikasının “Əmək” ordeninin təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə qanun layihəsini təqdim edib. Bildirib ki, “Əmək” ordeni ilə Azərbaycan Respublikasının vətəndaşları, əcnəbilər və vətəndaşlığı olmayan şəxslər istənilən fəaliyyət sahəsində Azərbaycanın inkişafına və rifahının təminin olunmasına yönəlmiş müstəsna əmək nailiyyətlərinə görə, o cümlədən sənaye, kənd təsərrüfatı, tikinti, nəqliyyat, ticarət, sənətkarlıq, xidmət və digər sahələrdə uzunmüddətli məhsuldar əməyə, elm, təhsil, səhiyyə, mədəniyyət, bədən tərbiyəsi və idman sahələrində fərqlənən əmək nailiyyətlərinə görə təltif edilirlər. Qanun layihəsi təsdiq olunub.

İclasda Azərbaycan Respublikasının İnzibati Xətalar Məcəlləsində dəyişikliklər edilməsi haqqında qanun layihəsinə də baxılıb. Bildirilib ki, layihəyə 162-1 və 162-2 maddələrinin əlavə edilməsi təklif olunur. Dəyişikliyə görə, ərizəçiyə dair məlumatların vahid məlumat bazasına onlayn rejimdə elektron formada daxil edilmədən telefon nömrələrini (sabit, mobil) operatorların şəbəkəsində aktivləşdirilməsinə görə vəzifəli şəxslər iki min manat, hüquqi şəxslər üç min manat məbləğində cərimə edilir. Dəyişikliklər Azərbaycan Respublikası Nazirlər Kabinetinin “Rabitə müəssisələri (operatorlar), həmçinin onların diler və distribüterləri tərəfindən rabitə vasitələrinin satışı və istifadəsi zamanı tələb olunan şərtlərin təsdiq edilməsi haqqında” Qərarından irəli gələn tələblərin yerinə yetirilməsinə görə inzibati məsuliyyət yaratmaq məqsədilə təklif olunur. Qanun layihəsi səsə qoyularaq qəbul edilib.

“Notariat haqqında” Azərbaycan Respublikasının Qanununda dəyişiklik edilməsi barədə qanun layihəsi barədə parlamentin hüquq siyasəti və dövlət quruculuğu komitəsinin sədri Əli Hüseynli məlumat verərək bildirdi ki, bu dəyişiklik “Hüquqi şəxslərin dövlət qeydiyyatı və dövlət reyestri haqqında” Qanuna uyğunlaşdırılma məqsədi daşıyır. Layihə səsə qoyularaq qəbul edildi.

İclasda, həmçinin “Yaşayış yeri və olduğu yer üzrə qeydiyyat haqqında” Azərbaycan Respublikasının Qanununda dəyişikliklər edilməsi barədə”, “Azərbaycan Respublikasının 1999-cu il 8 dekabr tarixli 773-IQ nömrəli Qanunu ilə təsdiq edilmiş “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun tətbiqi haqqında Əsasnamə”də dəyişikliklər edilməsi barədə”, “Azərbaycan Respublikası vətəndaşının yeni nəsil şəxsiyyət vəsiqəsinin və 15 yaşı tamam olmamış Azərbaycan Respublikası vətəndaşının fərdi identifikasiya kartının tətbiqi müddətləri ilə əlaqədar Azərbaycan Respublikasının bəzi qanunlarında dəyişikliklər edilməsi haqqında” və “Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2015-ci il 29 dekabr tarixli 86-VQD nömrəli Qanununda dəyişikliklər edilməsi haqqında qanun layihələrinə redaktə xarakterli dəyişiklik olundu.

Gündəlikdəki “Yetkinlik yaşına çatmayanların baxımsızlığının və hüquq pozuntularının profilaktikası haqqında” Qanunda dəyişiklik edilməsi barədə qanun layihəsi haqqında məlumat verən Əli Hüseynli bildirdi ki, yetkinlik yaşına çatmayanların tərbiyəsi, təhsili və ya saxlanması sahəsində valideynlərin və ya digər qanuni nümayəndələrin öz vəzifələrini yerinə yetirməməsinin üzrlü səbəbləri müəyyənləşib. Dəyişiklik yetkinlik yaşına çatmayanların baxımsızlığı ilə bağlı valideynləri və digər qanuni nümayəndələri müxtəlif bəhanələrdən çəkindirəcək. Layihə səsverməyə çıxarılaraq qəbul edildi.

“Məhkəmə-Hüquq Şurası haqqında” və “Məhkəmələr və hakimlər haqqında” Qanunda dəyişiklik edilməsi barədə qanun layihələri barədə hüquq siyasəti və dövlət quruculuğu komitəsinin üzvü Vüsal Hüseynov məlumat verdi. Bildirildi ki, yeni dəyişikliyə əsasən Azərbaycanda hakim haqqında cinayət təqibi ilə bağlı baş prokurorun təqdimatına baxılması müddətinin azaldılması nəzərdə tutulur. Dəyişikliyə əsasən, hakim haqqında cinayət təqibinin həyata keçirilməsinə razılıq verilməsi barədə Azərbaycan baş prokurorunun təqdimatına daxil olduğu gündən 72 saat müddətində baxılacaq. Hazırda bu müddət 10 gündür. Hər iki sənəd səsə qoyularaq qəbul edildi.

Sonra iclasda Cinayət-Prosessual Məcəlləsində dəyişikliklər edilməsi haqqında qanun layihəsi müzakirəyə çıxarıldı. Bu sənədlə də bağlı məlumat verən Vüsal Hüseynov vurğuladı ki, təklif olunan dəyişiklik məcəllənin normalarının təkmilləşdirilməsinə xidmət edir. Belə ki, Cinayət-Prosessual Məcəllənin 246-cı maddəsinə (şəxsi axtarış və götürmə) əlavə edilən yeni bənddə göstərilir ki, şəxsi axtarış və götürmə zamanı şəxsin soyundurulması zərurəti yarandığı halda videoçəkilişlər aparılmır. Bu halda şəxsi axtarış və götürmə müstəntiqin tapşırığı ilə barəsində həmin istintaq hərəkəti aparılan şəxslə eyni cinsdən olan şəxslərin iştirakı ilə aparılır. Bundan başqa, dəyişikliklə hadisə yerinin baxışı zamanı azı 2 hal şahidi iştirak etmədikdə videoçəkilişdən istifadə məcburi olacaq. Layihə səsə qoyularaq qəbul edildi.

“Dövlət qulluqçularının ayrı-ayrı kateqoriyaları üçün qısaldılmış iş vaxtı haqqında” Qanunda dəyişiklik edilməsi barədə qanun layihəsi haqqında məlumat verən komitə sədri Əli Hüseynli isə qeyd etdi ki, dəyişikliyə əsasən dövlət qulluğunda işləyə-işləyə 3 yaşınadək uşağını təkbaşına böyüdən valideynlərin iş saatı azaldılacaq. Həmin valideynlər üçün iş saatının həftədə 36 saat müəyyən edilməsi nəzərdə tutulur. Layihə səsverməyə çıxarılaraq qəbul olundu.

Milli Məclisin əmək və sosial siyasət komitəsinin sədri Hadı Rəcəbli isə “Turizm haqqında” və “Lisenziyalar və icazələr haqqında” Qanunda dəyişiklik edilməsi barədə qanun layihələri barədə məlumat verdi. Bildirdi ki, hər iki sənədə edilən dəyişiklik Miqrasiya Məcəlləsinə edilən dəyişikliyə uyğunlaşdırılma məqsədi daşıyır. Dəyişikliklər Azərbaycanda turizmin daha da inkişaf etməsinə xidmət edəcək. Sənəd səsverməyə çıxarılaraq qəbul edildi.

Sonra iclasda Cinayət Məcəlləsində dəyişikliklər edilməsi haqqında və Cinayət-Prosessual Məcəlləsində dəyişikliklər edilməsi haqqında qanun layihələri müzakirəyə çıxarıldı. Sənədlərlə bağlı məlumat verən Əli Hüseynli bildirdi ki, Cinayət Məcəlləsinin 148 və 323-cü maddələrinə dəyişiklik təklif olunur. Dəyişikliklərə əsasən, internetdə yalan yayanların və böhtan atanların cəzalandırılması nəzərdə tutulur. Eyni zamanda, dəyişikliyə görə, Azərbaycan dövlətinin başçısının - Azərbaycan Prezidentinin şərəf və ləyaqətini internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə ləkələmə və ya alçaltmaya görə min manatdan min beş yüz manatadək miqdarda cərimə və ya üç ilədək müddətə azadlıqdan məhrumetmə cəzası tətbiq olunacaq.

Müzakirələr zamanı çıxış edən deputatlar Fazil Mustafa, Elmira Axundova, Tahir Kərimli, Əflatun Amaşov, Aqil Abbas qeyd etdilər ki, bu dəyişikliklə heç bir mətbu orqana məhdudiyyət qoyulmur. Avropanın əksər böyük dövlətlərində sosial şəbəkələrdə böhtana və təhqirə görə cinayət məsuliyyəti müəyyən edilib. Azərbaycanda da bunun tətbiqinin zamanı yetişib. Dəyişikliklər səsə qoyularaq qəbul edildi.

Deputatlar, həmçinin “Azərbaycan Respublikası Dövlət Gömrük Komitəsinin 25 illiyi (1992-2017)” Azərbaycan Respublikasının yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə qanun layihəsinə də müsbət münasibət bildirdilər.

Gündəliyin sonuncu məsələsi isə “İdmanda dopinq vasitələrindən və üsullarından istifadəyə qarşı mübarizə haqqında” qanun layihəsi idi. Sənədi ikinci oxunuşda təqdim edən parlamentin gənclər və idman komitəsinin sədri Fuad Muradov bildirdi ki, ilk oxunuşdan sonra Ümumdünya Antidopinq Agentliyinin ekspertləri Azərbaycana gəliblər. Sənədin müzakirəsi zamanı layihəyə bir sıra əlavələr və dəyişikliklər edilib. Eyni zamanda, bəzi maddələrdən bir neçə müddəa çıxarılıb və layihə Azərbaycan idmanının inkişafına xidmət edəcək vacib sənəd kimi müzakirəyə çıxarılıb.

Milli Məclisin sədri Oqtay Əsədov mükəmməl şəkildə hazırlanan qanun layihəsinin II və III oxunuşda qəbul edilməsinin zəruriliyini vurğuladı. Sənəd əvvəlcə fəsil-fəsil, sonra isə hər iki oxunuş üçün səsə qoyularaq qəbul edildi.

Bununla da Milli Məclisin plenar iclası başa çatdı.