MİLLİ MƏCLİSİN YAZ VƏ NÖVBƏDƏNKƏNAR SESSİYALARI BAŞA ÇATMIŞDIR
AZƏRTAC xəbər verir ki, iyulun 4-də Mili Məclisin növbədənkənar sessiyasının növbəti iclası keçirilmişdir. Əvvəlcə cari məsələlərə baxılmışdır. Parlamentin sədri Oqtay Əsədov deputatların qaldırdıqları məsələlərə münasibətini bildirmişdir.
Sonra qanun layihələri müzakirə edilmişdir.
Milli Məclisin iqtisadi siyasət daimi komissiyasının sədri Ziyad Səmədzadə “Azərbaycan Respublikası Hökuməti və Qətər Dövləti Hökuməti arasında hava daşımalarına dair”, “Azərbaycan Respublikası Hökuməti ilə Litva Respublikası Hökuməti arasında beynəlxalq kombinə edilmiş daşımalara dair”, “Azərbaycan Respublikası Hökuməti və Litva Respublikası Hökuməti arasında dəmiryol nəqliyyatı sahəsində əməkdaşlıq haqqında” sazişlərin təsdiq edilməsi barədə sənədləri müzakirəyə təqdim etmişdir. Bildirilmişdir ki, Azərbaycan tərəfi adı çəkilən dövlətlərin aviasiya şirkətləri, eləcə də dəmiryol nəqliyyatı ilə müəyyən edilmiş marşrutlarda razılaşdırılmış xidmətləri həyata keçirəcəkdir.
“Azərbaycan Respublikası Hökuməti və Moldova Respublikası Hökuməti arasında vergi hüquqpozmaları ilə mübarizə sahəsində əməkdaşlıq və məlumat mübadiləsi haqqında”, “Azərbaycan Respublikası Hökuməti ilə Moldova Respublikası Hökuməti arasında sənaye mülkiyyətinin mühafizəsi sahəsində əməkdaşlıq haqqında” sazişlər də müzakirə olunmuşdur. Bildirilmişdir ki, bu sənədlər Azərbaycanın milli maraqlarına xidmət edir və ölkəmizin beynəlxalq əlaqələrini daha da genişləndirir.
Sənədlər ayrı-ayrılıqda səsə qoyularaq təsdiqlənmişdir.
Milli Məclisin hüquq siyasəti və dövlət quruculuğu məsələləri daimi komissiyasının sədri Əli Hüseynov “Konstitusiya Məhkəməsi haqqında” qanuna edilən əlavələr barədə məlumat vermişdir. Təklif olunan əlavəyə görə, Konstitusiya Məhkəməsi hakimlərinin səlahiyyət müddəti yeni hakimlərin təyin olunduğu gündən bitmiş hesab olunacaqdır. Deputatlar sənədə müsbət münasibət bildirmişlər.
“Məhkəmələr və hakimlər haqqında” qanuna da dəyişikliklər edilmişdir.
“Azərbaycan Respublikasının Torpaq Məcəlləsinə dəyişiklik və əlavələr edilməsi haqqında” qanun layihəsini müzakirəyə aqrar siyasət daimi komissiyası sədrinin müavini Eldar Quliyev təqdim etmişdir. Bildirmişdir ki, yeni dəyişikliyə görə, bələdiyyələr mülkiyyətlərində olan kənd təsərrüfatı təyinatlı torpaqların qeyri-kənd təsərrüfatı məqsədi ilə digər kateqoriyalara keçirilməsi üçün müvafiq icra hakimiyyəti orqanı qarşısında vəsatət qaldıra biləcəklər.
“Bələdiyyələrin əraziləri və torpaqları haqqında” Qanuna əlavə edilmiş “Azərbaycan Respublikasında bələdiyyələrin siyahısı”nda dəyişikliklər edilməsi barəsində qanun layihəsini Milli Məclisin regional məsələlər daimi komissiyasının sədri Arif Rəhimzadə təqdim etmişdir. Bu sənəd də qəbul olunmuşdur.
Milli Məclis sədrinin birinci müavini, təhlükəsizlik və müdafiə məsələləri daimi komissiyasının sədri Ziyafət Əsgərov “Hərbi qulluqçuların statusu haqqında” Qanuna, “Azərbaycan Respublikası Silahlı Qüvvələrinin Qarnizon və qarovul xidmətləri Nizamnaməsi”nə, “Azərbaycan Respublikası Silahlı Qüvvələrinin Daxili xidmət Nizamnaməsi”nə edilən dəyişikliklər və əlavələr barədə məlumat vermişdir.
Daha sonra “Feldyeger rabitəsi haqqında”, “Feldyeger rabitəsi orqanında xidmətkeçmə haqqında Əsasnamə”yə, “Kəşfiyyat və əks-kəşfiyyat fəaliyyəti haqqında”, “Əmək pensiyaları haqqında”, “Ədliyyə orqanlarında qulluq keçmə haqqında”, “Auditor xidməti haqqında”, “Auditorlar Palatası haqqında Əsasnamə”yə və Azərbaycan Respublikasının İnzibati Xətalar Məcəlləsinə əlavələr və dəyişikliklər edilmişdir. Bildirilmişdir ki, bu dəyişikliklər mövcud qanunvericiliyin daha da təkmilləşməsinə xidmət edəcəkdir.
Qanun layihələri ayrı-ayrılıqda səsə qoyularaq təsdiq edilmişdir.
Bununla da Milli Məclisin yaz və növbədənkənar sessiyası işini başa çatdırmışdır.
Azərbaycanın dövlət himni səsləndirilmişdir.
Bölmənin digər xəbərləri
