Bakı, 15 dekabr, AZƏRTAC

Ermənistanın mina terroru davam edir. Azərbaycan dövləti də, xalqı da bu məsələdən maddi və mənəvi cəhətdən ziyan çəkir. Müvafiq qurumlarımız minaların aşkar edilərək zərərsizləşdirilməsi işində bütün bilik və bacarıqlarını ortaya qoyurlar. Dövlətimiz bununla əlaqədar əlavə vəsait də xərcləyir, xarici ekspertləri dəvət edir və ya onların təcrübəsindən yararlanır. Yerli və xarici mütəxəssislər məsələnin ciddiliyi ilə bağlı mütəmadi çıxışlar etsələr də, dünya ictimaiyyəti hələ də susur.

Bunu AZƏRTAC-a açıqlamasında politoloq Şəbnəm Həsənova söyləyib.

Politoloq qeyd edib ki, uzağa getmədən yaxından başlamaqda fayda var. Belə ki, üçtərəfli Bəyanatın qarantı Rusiyadır. Məhz Rusiya da Ermənistana ən çox təzyiq edən tərəf olmalıdır. Moskva nəinki mina xəritələrini alıb Azərbaycan tərəfinə təqdim etməli, həm də yeni minaların basdırılmasının qarşısını almalıdır. Bunların heç biri yerinə yetirilmir, onların qarşısı alınmır, tam əksinə, hələ də davam etdirilir. Deməli, məsələ ondan ibarətdir ki, mina terroru vasitəsilə Böyük Qayıdışın ləngidilməsi təkcə Ermənistanın əl atdığı məkrli həmlə deyil. Bu, həm də iki dövlətin və xalqın reinteqrasiya məsələsinə hər vəchlə mane olmağa çalışan qüvvələrin planıdır. Minaların hazırlanması vəsait tələb edən məsələdir. Burada maddi vəsait xərclənən minalar insan tələfatına və xəsarətinə gətirib çıxarırsa, mənəvi olaraq da iki xalqın bir-birinə düşmənçiliyinin davamlılığını uzunmüddətli edir. Təbii ki, cəzasız qalan, qızışdırılan Ermənistan da məğlubiyyəti həzm edə bilmir, zəhərini minalarla tökür.

Politoloq qeyd edib ki, Ermənistanın mina xəritələrinin onda olmadığını bildirməsi indiyədək verdiyi mina xəritələrinin koordinatları qədər yalandır. Ermənistan üçtərəfli Bəyanatın imzalanmasından sonrakı ilk 8 ay ərzində də xəritələrin, ümumiyyətlə, mövcudluğunu inkar edirdi. Onda sual olunur, bəs yox idi! Şübhəsiz ki, Ermənistan minaların yerini də, sayını da gözəl bilir. Məlumatlı tərəf, sadəcə, Ermənistan deyil. Nəzərə alsaq ki, verilən minaların etibarlılığı 25 faizdir və mina partlayışlarının təqribən 55 faizdən çox hissəsi xəritələrdən kənar yerlərdə baş verir, deməli, məqsəd daha çox insan tələfatı törətmək, vaxt uzatmaqdır ki, Böyük Qayıdış yubadılsın, Azərbaycana maddi ziyan vurulsun, infrastruktur layihələrinə sərmayə qoyan investorlar bu niyyətlərindən çəkinsinlər. Odur ki, mina terrorunun davam etdirilməsi, sözün bütün mənalarında, xalqımıza qarşı tətbiq edilən soyqırımı cinayətidir.

“Ağdam, Kəlbəcər və Laçından çıxmaq üçün əlavə vaxt istəniləndə Azərbaycan bir tərəfdən Ermənistana qarşı humanist siyasət ortaya qoydusa, digər tərəfdən üçtərəfli Bəyanatın digər iştirakçısına hörmət əlaməti olaraq buna icazə verdi. Ermənilər isə verilən vaxtı qənimət bilib əraziləri minalarla doldurdular. Azərbaycanın bu və buna oxşar digər humanist jestləri, addımları, öhdəliyinə sadiqliyi mütləq nəzərə alınmalıdır, özü də, sadəcə, Ermənistan-Azərbaycan münasibətləri kontekstindən deyil.

Beynəlxalq təşkilatlar da, fərdi olaraq ayrı-ayrı dövlətlər də Ermənistanın bu əməllərini pisləməlidirlər. Ötəri bəyanatlar, kəsərsiz sözlər deyil, konkret təzyiq olmalıdır”, - deyə Ş.Həsənova vurğulayıb.