Mingəçevir Dövlət Universitetində imtahan sessiyası uğurla davam edir
Bakı, 9 iyun, AZƏRTAC
Mingəçevir Dövlət Universitetində (MDU) 2019/2020-ci tədris ilinin yaz semestrinin onlayn formatda keçirilən imtahan sessiyası uğurla davam edir.
MDU-dan AZƏRTAC-a bildirilib ki, “Microsoft Teams” platforması üzərindən şifahi formada təşkil olunan ikinci imtahan günündə ümumilikdə 34 qrup üzrə 573 tələbənin iştirakı nəzərdə tutulub.
Məsafədən təhsil alətlərinin və informasiya-kommunikasiya vasitələrinin tətbiqi ilə təşkil olunan imtahanlar akademik heyət və tələbələrin yüksək aktivliyi şəraitində keçir. Faktiki olaraq imtahan prosesindən kənarda qalan tələbə yoxdur. Müəllim və tələbələrin evdən qoşulduqları imtahanların təşkilində MDU-nun gənc əməkdaşları və könüllü tələbələri xüsusi fəallıq göstərirlər.
Çoxsaylı güzəştlərlə müşayiət olunan imtahan sessiyasının ikinci günündə də bütün tələbələr yalnız müvəffəq qiymətlər alıblar.
Bölmənin digər xəbərləri
