MİNGƏÇEVİRDƏ ƏT-SÜD MƏHSULLARI TƏDARÜKÜ VƏ EMALI MÜƏSSİSƏSİ AÇILMIŞDIR
Bu münasibətlə keçirilən mərasimdə çıxış edən şəhər icra hakimiyyətinin başçısı Məhəbbət Qarabağlı iyunun 8-də Azərbaycan Prezidenti İlham Əliyevin Mingəçevirdə keçirdiyi müşavirədən sonra görülmüş işlər barədə məlumat vermişdir. Kənd Təsərrüfatı Nazirliyinin mütəxəssisləri, qonşu rayonlardan gəlmiş kəndli-fermer təsərrüfatlarının nümayəndələri ət-süd məhsullarının qəbulu, emalı və satışı ilə məşğul olan bu müəssisənin açılmasını yüksək qiymətləndirmişlər.
Sahibkar Əlif Abbasov müasir avadanlıqla təmin olunmuş, 50 nəfərin çalışdığı bu müəssisəni dövlət başçımız İlham Əliyevin Prezident seçılməsinin birinci ildönümünə hədiyyə etdiyini, hər il istehsal təyinatlı təzə bir obyekt açmaqla həmin ənənəni davam etdirəcəyini bildirmişdir.
Qeyd olunmuşdur ki, sahibkarlar ölkəmizin rəhbərinin apardığı daxili və xarici siyasəti dəstəkləyir, xüsusilə regionların sosial-iqtisadi inkişafına göstərdiyi diqqət və qayğını yüksək qiymətləndirirlər.
Açılış mərasimindən sonra tədbir iştirakçıları yeni müəssisədə istehsal prosesinin təşkili və işçilərin istirahəti üçün yaradılmış şəraitlə tanış olmuşlar.
Bölmənin digər xəbərləri
