İQTİSADİYYAT
Minskdə “Belaqro-2021” 31-ci Beynəlxalq Sərgisi açılacaq
Minsk, 31 may, AZƏRTAC
Belarus Respublikasının paytaxtı Minsk şəhərində “Belaqro-2021” 31-ci Beynəlxalq Sərgisi keçiriləcək.
AZƏRTAC xəbər verir ki, sərgidə Azərbaycan Kənd Təsərrüfatı Nazirliyi və Qida Təhlükəsizliyi Agentliyinin nümayəndə heyətlərinin iştirakı gözlənilir.
“Belaqro” Minskdə iyunun 1-dən 5-dək keçirilməsi nəzərdə tutulmuş aqrosənaye həftəsi çərçivəsində təşkil olunur. Tədbirdə 16 ölkədən, o cümlədən Rusiya, Böyük Britaniya, Fransa, Niderland, İtaliya, Litva, Çin, İordaniya və digər ölkələrdən 400-dən çox şirkət iştirak edəcək.
Sərginin ekspozisiyası iki pavilyonda və açıq havada nümayiş olunacaq. Sərginin işgüzar proqramına 20-yə yaxın konfrans və seminar daxildir. İştirakçılar məhsulların rəqabətqabiliyyətliliyinin artırılması, pilotsuz kənd təsərrüfatı texnikasının tətbiqi, heyvandarlıq və əkinçilik sahəsində innovasiyalar və digər məsələləri müzakirə edəcəklər.
Fəridə Abdullayeva
AZƏRTAC-ın xüsusi müxbiri
Minsk