MİQRANTLAR RUSİYADA DEMOQRAFİK VƏZİYYƏTİ YAXŞILAŞDIRA BİLƏRLƏR
AZƏRTAC-ın xüsusi müxbiri xəbər verir ki, Rusiyada demoqrafik vəziyyət pisləşməkdədir. Təkcə son beş ildə rusiyalıların sayı 3 milyon nəfər azalmışdır. Əvvəlki on ildə - 1992-2002-ci illərdə də ölkə əhalisinin sayı bu qədər azalmışdı. Federal Dövlət Statistika Xidməti (Rosstat) 2008-ci ilin yanvar-may aylarında Rusiya əhalisinin sayı barədə məlumatları dərc etmişdir. Həmin məlumatlardan görünür ki, beş ayda rusiyalıların sayı 119,9 min nəfər azalmışdır. Bu il iyunun 1-nə olan məlumata görə, ölkə əhalisinin sayı 141,9 milyon nəfərdir.
Əhalinin sayının azalmasının əsas səbəbi təbii artımın aşağı düşməsidir: Rusiyada doğulanların sayı ölənlərin sayından xeyli azdır. Bu ilin ilk beş ayında 679,7 min nəfər doğulmuş, 902,8 min nəfər ölmüşdür. Doğum göstəricisinin artması ilə yanaşı (bu ilin ilk beş ayında doğulan uşaqların sayı ötən ilin ilk beş ayı ilə müqayisədə 54,2 min nəfər çox olmuşdur), ölənlərin sayı da artmışdır (8 min nəfər). Əvvəlki illərdə olduğu kimi, miqrasiyanın artması say itkisini qismən kompensasiya etmişdir. Tədqiqatın müəlliflərinin fikrincə, miqrantlar (bu ilin 5 ayında onların sayı 100 min nəfəri keçmişdir) əhali artımının mühüm mənbələrindən biri kimi qalmaqdadır. Ekspertlərin fikrincə, Rusiya öz geniş ərazisini yalnız yaşayış şəraitinin keyfiyyətini yaxşılaşdırmaq və savadlı miqrasiya siyasəti sayəsində əldə saxlaya bilər.
Bölmənin digər xəbərləri
