Bakı, 10 iyun, AZƏRTAC

Azərbaycan və Misir xalqları arasında hələ sovet dövründə sıx mədəni əlaqələr mövcud idi. Tanınmış mədəniyyət xadimlərimiz tez-tez bu ərəb ölkəsinə qastrol səfərlərinə gedər, orada konsert proqramları ilə çıxış edərdilər. Misirdə siyasi fəaliyyətlə məşğul olan azərbaycanlılar SSRİ-Misir əlaqələrinin inkişafında da mühüm rol oynayırdılar. Amma ölkələrimizin siyasi əlaqələri 1994-cü ildən sonra - Ulu Öndər Heydər Əliyevin Qahirə səfəri ilə daha da gücləndi. Ulu Öndər Misir–Azərbaycan Dostluq Cəmiyyətinin nümayəndələri ilə görüşdə qeyd etmişdi ki, iki ölkə arasında əlaqələrin tarixi çox böyükdür. Bizim xalqlarımız uzun əsrlər boyu bir-biri ilə sıx əlaqədə olub, bir-birinə kömək göstəriblər. Bizim milli, dini, tarixi ənənələrimizdə çox oxşarlıq, eynilik var. Qarabağ münaqişəsində Misirin daim Azərbaycanı dəstəkləməsi, beynəlxalq təşkilatlarda ölkəmizin ədalətli mövqeyini müdafiə etməsi münasibətlərimizdəki səmimi dostluq bağlarını daha da gücləndirib.

Bu sözləri AZƏRTAC-a açıqlamasında politoloq Ramiz Alıyev söyləyib.

Misirlə Azərbaycanın bir sıra ortaq mənəvi dəyərlərə malik olduğunu deyən politoloq bildirib ki, bu, bizə bir-birimizi daha yaxşı anlamağa kömək edir. Misir və Azərbaycan dünyada İslam həmrəyliyinin möhkəmlənməsinə, mötədil İslamın inkişafına mühüm töhfə verir. Həmçinin bu gün Azərbaycanda Misirin 10-dan çox şirkəti fəaliyyət göstərir. “Energetika, kənd təsərrüfatı, əczaçılıq, nəqliyyat və digər sahələrdə əlaqələrin inkişafı üçün böyük potensial mövcuddur. Əhalisi 100 milyondan çox olan Misir böyük bazar olmaqla yanaşı, strateji coğrafi mövqeyə malikdir. Afrika, Yaxın Şərq və digər regionlara əlverişli çıxış imkanları olan ölkə kimi Misirlə iqtisadi əməkdaşlığı gücləndirmək Azərbaycanın marağındadır. Prezident İlham Əliyevin Misirə son rəsmi səfəri ölkələrimiz arasında münasibətlərin inkişafına böyük töhfə verdi. Dövlətimizin başçısı Qahirədə açıq şəkildə qeyd etdi ki, bütün beynəlxalq məsələlərdə Misir və Azərbaycanın fikirləri üst-üstə düşür. Hər iki ölkə beynəlxalq təşkilatlar çərçivəsində fəal çalışır, o cümlədən BMT, Qoşulmama Hərəkatı, İslam Əməkdaşlıq Təşkilatı çərçivəsində fəal əməkdaşlıq edir, İslam həmrəyliyinin gücləndirilməsi istiqamətində birgə səy göstərir.

“Azərbaycanın Qoşulmama Hərəkatına sədrlik etdiyi dörd il ərzində Fələstin-İsrail münasibətləri daim diqqətdə saxlanılıb. Biz rəsmən müstəqil Fələstin Dövlətinin yaradılmasına dəstəyimizi nümayiş etdirmişik. “Müstəqil Fələstin Dövləti qurulmalı, Şərqi Qüds onun paytaxtı olmalıdır” yanaşmasını daim ortaya qoymuşuq. Prezident İlham Əliyev bu mövqeni həm İstanbulda keçirilən beynəlxalq konfransda, həm də 2022-ci il noyabrın 1-də Əlcəzairdə Ərəb Dövlətləri Liqasının 31-ci Zirvə toplantısının açılış mərasimindəki çıxışında səsləndirib. Azərbaycanın Ərəb-İslam dünyasının mərkəzlərindən biri olan Misirdə belə bir prinsipial mövqe ortaya qoyması xarici siyasətimizdəki prinsipiallıqdan xəbər verir. Baxmayaraq ki, bizim İsrail dövləti ilə də çox yaxşı əlaqələrimiz var”, - deyə politoloq vurğulayıb.

R.Alıyev qeyd edib ki, diplomatik əlaqələr qurulandan sonra Azərbaycana gələn ilk Misir Prezidenti Əbdülfəttah Əs-Sisi olub. “Yaxın keçmişimizdə böyük təlatümlərdən keçən Misir və Azərbaycanda bu gün siyasi sabitlik, dinamik inkişaf mövcuddur. Azərbaycan Prezidenti Qahirədə mətbuata bəyanatında qeyd etdi ki, islami dəyərlərə daim böyük önəm verən Azərbaycanda məscidlərdən 65-i işğalçı Ermənistan dövləti tərəfindən ötən 30 il ərzində tamamilə dağıdılıb. Prezident İlham Əliyev Azərbaycanın özünümüdafiə hüququndan istifadə edib işğala son qoyduğunu, ərazi bütövlüyünü və suverenliyini tam bərpa etdiyini dedi. Dövlətimizin başçısı azad olunmuş ərazilərdə məscidlərin, İslam irsinin bərpası istiqamətində tədbirlərin həyata keçirildiyini, artıq beş məscidin bərpa olunduğunu diqqətə çatdırdı. İslam mədəniyyətinin paytaxtı elan olunan Şuşa bu gün bütün müsəlman ölkələri üçün doğma şəhərdir. Beləliklə, Azərbaycan dövlətinin yürütdüyü xarici siyasət təkcə öz ölkəmizə uğur gətirmir, həm də beynəlxalq aləmdəki dost və tərəfdaşlarımızın nüfuzunun artmasına kömək edir. Bu baxımdan qeyd edə bilərik ki, dövlət başçılarının qarşılıqlı səfərləri ölkələr arasında siyasi və mədəni əlaqələrin qurulmasında böyük əhəmiyyət daşıyır. Bu gün Azərbaycan-Misir münasibətləri yeni inkişaf mərhələsinə qədəm qoyub. Prezident İlham Əliyevin Misirə rəsmi səfəri ölkələrimiz arasında əməkdaşlığın dərinləşdirilməsinə töhfələr verəcək”, - deyə o əlavə edib.